千嬅嫁槍王老公生兔B壓力大

楊千嬅日前率領余文樂等歌手團拜，恨生仔的她收到余文樂送的「百發百中」揮春，即笑說：「當我老公係槍王之王呀？」

余文樂、何韻詩、王菀之、劉浩龍、藍奕邦及蘇永康等一見「丁太」楊千嬅出現，即向她(逗)利是，還即興寫揮春互相祝賀。阿樂知道千嬅趕在兔年做媽媽，即寫下「百發百中」送給對方，千嬅笑到四萬咁口：「當我老公係槍王之王呀？」並以「天降美女」回敬阿樂，引得全場捧腹大笑！適逢今年年初一是千嬅生日：「情人節又撞我農曆生日，新年要拜年，唔會同老公慶祝。」對於老公丁子高多次表示恨在兔年做爸爸，她說：「順其自然，佢搞到我好大壓力。（不設防？）年頭同年中都有兩套戲，又成日飛。（拍戲合約准生仔？）唔會咁簽，有啲嘢要衡量，要有工作道德。」她又踢爆老公是傳統男人：「話佢係Playboy，Play唔到啦佢！（有BB公開？）咁大個肚呃唔到，只要我唔係好似兔仔跳大家就知咩事啦！」

阿樂則表示會盡快拍拖及成家立室，更自爆被母親以激將法催婚，但不會奉子成婚。問到是否要求高？他說：「只要唔係男人，識得生仔就得！」

望農曆三月前有喜

另一邊廂的丁子高昨日出席海港城賀年活動，他笑說：「非常努力造人中，希望喺農曆三月前成事，兔B旺屋企！有相士話我今年好大機會有BB！」他透露與千嬅看中醫調理身體，要戒飲奶、咖啡及汽水。問到如何跟千嬅慶祝生日？他說：「年三十晚幫佢搞咗個Party。（送咩禮物？）用我哋由相識到依家嘅相整咗一個表送畀佢。新年同朋友玩魚蝦蟹，我做咗十個鐘頭莊！（冇時間造人？）新年都要放吓假。」問到會否考慮人工受孕？他表示要先順其自然，但並不反對。