Sa霆預支蜜月泰國慶合合

Angelababy被發現趁年初一與黃曉明在澳門玩煙花，舊愛陳偉霆（William）亦唔執輸，秘密與女友蔡卓妍（阿Sa）到泰國「慶合合」度歲，預支蜜月，各有各Sweet！

去年擦出愛火的William與蔡卓妍（阿Sa），公開戀情後不時公開晒幸福，愛火焚身的William更在頒獎禮中向女友高呼「我愛你」，相當肉麻！今年是「陳蔡」拍拖後首個農曆新年，二人沒有留港度歲，反而赴泰蜜遊數天，過一個熱辣辣的新年！二人在海灘享受陽光及戲水，公認身材Fit爆的William，在女友面前大晒結實胸肌及腹肌，讓她揸機狂影，十分溫馨！

昨日William出席英皇新春活動時，承認與阿Sa在泰國度歲：「我哋想低調啲，但畀狗仔隊發現咗。（預支蜜月？）唔係，只係去玩幾日，下次去旅行要去遠啲，最想去非洲。」記者笑問他們有否互相推油，他笑說：「多謝阿媽生得我手長腳長，自己搽到，阿Sa本身有跳芭蕾舞，筋骨好柔軟，不過有冇推係我哋之間嘅小秘密。」

甜蜜拖手仔

對於有堪輿學家不看好「陳蔡戀」，指他們的戀情充滿危機，William淡定地說：「絕對要拆佢哋招牌！」問到會否與阿Sa訂婚，他說：「唔訂婚住，要努力工作。」另外，他表示有意置業作投資之用，但未必住在阿Sa附近：「我都係少少投機，香港咁方便，唔使住咁近。」活動結束後，記者再致電William，問到蜜遊被發現是否掃興，他說：「都有影響計劃，我哋本身好為食，因為沿途有狗仔隊跟住，唔敢周圍食嘢同買嘢。（會唔會被影激凸相？）應該冇。（火辣辣場面？）冇呀！最多只係拖手仔。」

微博呻懷念

盡興而返的William與阿Sa，忍不住在微博晒泰國靚相，阿Sa上載自己的剪影相及身穿桃紅色吊帶衫的照片，並寫道：「我的假期結束了，很懷念陽光與海灘喔！我現在又充滿力量，今年一定要更加努力工作，為下一個假期奮鬥！」而William則上載在當地的美食相，幸福滿瀉！