Fiona笑方大同發到爆肺

單身的薛凱琪（Fiona）只愛姻緣，不求桃花，而財多身子弱的方大同，則被Fiona取笑有錢到爆肺，兔年兩人繼續展開搵銀大計。

早前與唱片公司監製傳出緋聞的Fiona被指惹桃花，對此她笑說：「搞笑！佢唔係我朵桃花。我覺得桃花多唔代表好，我要姻緣！（咩條件？）專一同人品好，好似好簡單，但其實已經夠難！」新年後她再會到內地接劇搵銀，她承認內地片酬豐厚，而她的普通話也進步不少。雖然片約不斷，但她最着緊是其歌唱事業，寧願自己辛苦，也堅決返港宣傳。

至於方大同被唱片公司形容為最賺錢歌手，他笑說：「舊年係賺得最多嘅一年，做咗超過20場巡迴演唱。」賺到盆滿缽滿的他，卻犧牲休息時間，更一度爆肺入院，結果被Fiona取笑：「嘩！你有錢到爆肺。」專注創作的大同表示很久沒有放假，而今年工作已排到滿瀉，年底將再舉行演唱會。

周子揚紅底賀歲

兔年伊始，Fiona、方大同、周柏豪、周子揚及連詩雅聚首一堂團拜，去年柏豪在樂壇取得好成績，他開心得到大家認同。而周子揚及連詩雅則喜歡新年夠熱鬧，子揚透露跟足家人傳統，由初一至初七都着新底。