李彩華睇中8千蚊大褸嫌太貴忍手

新春將至，大家都努力辦年貨，近年密密北上搵人仔的李彩華，趁着假期做孝順女陪媽咪買衫過年，更不看價錢牌任由媽咪掃貨；但當她自己睇中一件價值八千元的外套時竟嫌貴。而丁子高亦趁空檔與媽咪到超巿掃貨。

李彩華（Rain）初出道已賺錢代父償還逾百萬元債務，近年主要在內地發展的她，劇接劇搵銀，單是出席活動便賺六位數字酬勞，總算捱出頭來。日前下午2時半，Rain趁空檔返港與媽咪辦年貨，她們現身銅鑼灣連鎖電器用品店，在櫃位研究電話及電腦，但未能揀選心頭好。雖然當日天氣寒冷，但Rain竟無懼寒風脫去外套，露出玉臂翹着媽咪「企街」篤魚蛋。

行足一日齋買指甲油

其後，Rain陪媽咪睇衫，並在旁協助及細心為媽咪度身，逗留不足半小時，李媽媽已極速揀選數件新衫迎新春，身為孝順女的Rain即二話不說付款。然後又帶媽咪挑選電話，最後李媽媽睇中一部粉紅色電話，測試一輪後Rain主動付款及為媽咪拿取戰利品。兩母女辦完年貨便分道揚鑣，Rain獨自到附近的名店睇衫，期間睇中一件價值逾八千元的透明膠外套，並即場試身，但最終不合心水，並轉戰CHANEL化妝品專櫃購買指甲油。事後Rain說：「媽咪鍾意都會買！（唔捨得買畀自己？）睇吓有冇需要！」

丁子高不忘SMS千嬅

另外，丁子高日前陪媽媽到銅鑼灣超市辦年貨，挑選日式拉麵及餃子，當丁媽媽試食最新出品的日本番薯時，深愛老婆楊千嬅的丁子高，亦不忘發短訊慰妻！