羅力威孤獨宅男

前年無綫和亞視分別舉辦《超級巨聲》和《亞洲星光大道》，帶點周杰倫唱腔、外貌有點像言承旭的羅力威棄大台，選擇在亞視參賽，可能是這股「鋤強扶弱」的精神，令他贏得大批Fans支持。他說：「我曾經喺亞視嘅音樂圖書館內工作，幫手揀片頭片尾歌，雖然已經離開咗兩年，但亞視對我嚟講好有親切感。（有冇着數？）評判分數一定冇，最多係當初排隊參賽時，可以安排我企前啲。」

怕醜黑面神

出道不久，羅力威即被冠以「黑面神」稱號，經過一輪了解，發現原來他是「宅」得太久：「我份人『宅』到爆！平時好少出街，見來見去得幾個朋友，所以初入行時好驚，依家開始習慣。」他透露過去曾經做過售貨員，但怕醜性格令他成為生意額最差的一個。

欠債心有愧

羅力威是一個視錢財如糞土的人，年少時曾為玩音樂欠下一筆債，他自知是壞榜樣，回想當初仍覺得心有愧，他說：「我唔需要奢侈品，但有一段時間，我曾經為作曲專登租咗一個地方，每日坐車、食飯都係錢，當時又不事生產，唔覺意碌咗一筆卡數，真係壞榜樣！好彩我喺屋企排行最細，冇乜經濟負擔，亦好感激屋企人一直支持，由參賽至今都冇畀過壓力我，依家可以有多餘錢畀屋企，令父母好放心。」論吸金能力，羅力威可能不及林欣彤，不過他每次出席活動都有數百Die Hard粉絲撐場，與天王級數有得揮！他謙虛地說：「其實我除咗香港以外，其他地方冇人識我。（張敬軒話你喺珠三角好紅？）我未Feel到，不過好開心有一班固定Fans。（聽講你班Fans好鍾意畀利是你？）哈哈，可能佢哋大個啲，記得去年做《星光》騷，Fans不停將利是掟上台，雖然接唔晒，但都有一個大膠袋，仲有好多都未拆。」

越級戰林峯

雖然未推出過唱片，但羅力威的人氣和實力確實不容忽視，早前就憑一首自己作曲、編曲的作品《現實不重要》打入叱咤樂壇頒獎禮，同時揮低「亞太區最受歡迎男歌手」林峯入圍我最喜愛男歌手五強，他有點不好意思說：「冇話打低邊個，怕被人誤會我越級挑戰，其實我家姐都係林峯Fans。」羅力威自覺未到位，站在頒獎禮台上會感到不自在：「覺得好緊張，望吓其他人有乜反應？擔心人哋會對我產生反感。」

姓名 ：羅力威（Adason）

花名 ：威威、黑面神、翻版言承旭

年齡 ：24歲

出道 ：參加第一屆《亞洲星光大道》入行，贏得冠軍後簽約亞洲電視。

年資 ：一年

代表作 ：《現實不重要》

吸金額 ：80萬元

粉絲人數：27,847（國際歌迷會）；58,630（Facebook）