小巨肺與眾彤樂

「星光幫」的羅力威、「巨聲幫」的林欣彤（Mag），兩粒都是憑電視台歌唱比賽一鳴驚人的新星！同一份音樂上的堅持與執着，兩人惺惺相惜，卻因為「打對台」的關係「冇偈傾」！新血交鋒，必有一番惡鬥！

歇斯底里的一句「還是愛你愛你愛你愛你，難道還不能清醒」，「小巨肺」林欣彤「唱紅了」G.E.M.的《AINY》，摘下《超級巨聲2》冠軍，平地一聲雷，爆紅了！Mag走紅速度非常驚人，去年9月才贏出比賽，幾個月內歌影視三棲發展，再加上出騷代言拍廣告，保守估計穩袋近百萬元，僅20歲、仍是學生的她以光速速度成為城中炙手可熱的小富婆！

性格率直的Mag坦言賺錢勁多：「對我嚟講勁多！有六位數字。」以往慣以巴士代步、一星期得五百元零用的生活因她的成名而遠去，但慳家的她並冇因此「使大咗」：「因為工作關係搭多咗的士，不過都唔係使好多，都係買衫、化妝品呢啲，最貴都係買咗部Macbook送畀自己。仲有唔使屋企畀零用錢，自己Carry到，會畀錢屋企人添！」雖然荷包脹滿，但她卻未想過買豪宅：「有諗過搬屋，仲計劃緊，但係唔鍾意豪宅，唔想啲屋太大，我本身養狗，想買村屋，不過交通要方便。」

講錢傷理念

有實力自然成為搶手貨，Mag成為各大唱片公司虎視眈眈的目標，有傳英皇開價四百萬元將她簽到手，不過她否認傳聞；至於四百萬元是否合適價位，她自言摸不着頭腦：「唔知點衡量，錢唔係真係太吸引，反正點都搵唔晒，最緊要音樂理念一致，做到真正想做嘅嘢唔係錢買到嘅。」合約繁瑣事，Mag交由經理人負責，眼下最着緊是完成學業，食住個勢出碟反而不是她那杯茶：「呢方面唔想太Push，唔希望唱片純粹係因為依家紅而出，想多啲時間準備，唔擔心人氣問題，反而如果到時人氣冇咁勁，買碟嘅就係真正鍾意自己嘅人！」

照去篤魚蛋

當日一夜成名，Mag百感交集得來不知所措，似站在十字路口：「啱啱贏嗰時好似發緊夢咁，有開心，因為終於完成比賽，但亦有一半負面情緒，突然間有好多嘢出現，連續一個禮拜都有記者跟住我！」奪冠當晚她去了慶功，返家後因食了感冒藥瞓到昏迷，醒來發現電話全是記者來電：「佢哋問好多唔關事嘅嘢，問男朋友問緋聞，初初未接受到，好大壓力，有喊，要同人傾訴做心理調整，過咗一個禮拜度先開始適應。」現在她放學後依舊跟同學在商場篤魚蛋行街買衫，並冇因為公眾人物身份摒棄私人生活。

身兼學生及藝人，Mag坦言有點吃不消，當初有人提議停學，但被她斷然拒絕：「佢哋話應該好好爭取幕前機會，唔應該畀其他嘢束縛，但係我爭一年就畢業，唔想半途而廢，好堅決覺得要讀埋佢。」Mag努力在兩者間取得平衡，而老師及同學亦對她特別照顧，令她非常感動：「雖然依家真係好攰，陪唔到身邊人，連自己放鬆時間都冇，但難得有機會實現夢想，幾辛苦都做！」

姓名 ：林欣彤（Mag）

花名 ：小巨肺

年齡 ：20歲

出道 ：參加《超級巨聲2》入行，奪冠後與無綫簽下經理人合約。

年資 ：四個月

代表作 ：《AINY》（原唱：G.E.M.）

吸金額 ：100萬元

粉絲人數：9,546（官方國際歌迷會）；4,353（Facebook）