松岡李那賺血汗錢

33C日模松岡李那小時候已兼職做侍應，收入不錯，曾月入高達八萬日圓，更有不少男士追求！不過，她表示侍應是個值得尊重的職業，對着客人要笑容滿面，但背後卻有不少辛酸，曾試過洗杯時洗到出血！

十五歲已開始兼職做侍應的日模松岡李那表示，日本人在咖啡室或餐廳當侍應是十分普遍：「因為我好鍾意煮嘢食，同埋又可以賺零用錢，試過最高一個月薪水有八萬日圓（約7,500港元），我畀媽咪之外，攞咗萬六日圓嚟學跳舞，一萬日圓買手提電話！」當侍應除要服務客人外，還要拖地洗碗一腳踢，她說：「試過有次洗緊一堆杯，又要睇住店面，洗洗吓突然見到泡泡有鮮紅色，原來右手手指公(界)損咗都唔知，到依家都有個疤！其實我哋要尊重侍應，因為佢哋全日都要保持笑容，又要幫你落單整嘢食，又要清潔，真係好辛苦o架！」

狂蜂浪蝶飛埋身

松岡是美女一名，年紀小小做侍應必惹來不少狂蜂浪蝶，她說：「都有好多男仔主動認識我，不過日本人喺呢方面會矜持啲，啲男仔識我時會主動畀電話我，唔會逼我畀自己嘅聯絡方法佢哋，不過咁耐以嚟，我都冇搵過佢哋！」她認為日本和香港的咖啡室文化及特色不同：「早排我喺香港一間咖啡室，個侍應送杯飲品嚟嗰時，好大力『嘭』一聲放喺枱，我即刻嚇咗一跳，我仲反問佢：『Are you angry with me？』」

技癢露兩手冧客

採訪當日，松岡李那不斷用廣東話大叫：「我鍾意煮嘢食！」一去到水吧，在店員指導下，她即大展身手整朱古力Smoothie及肉醬意粉，接着她又親自招呼客人。由於她用英語跟客人溝通，加上笑容搭夠，無論落單及埋單時，都以廣東話頻說：「唔該晒！」贏了不少印象分！松岡說：「我識煮咖啡、蛋糕、曲奇餅等，我有諗過將來開間咖啡店，客人可以試吓我嘅手勢！」