過來人鄧兆尊撐賭王心水清

何家爭產事件轟動全城，曾經是「鄧家爭產」主角之一的鄧兆尊，細訴兩家人淵源，更認為賭王「年紀大心水清，冇人能阻其決定！」

十多年前哄動一時的「鄧家爭產」事件主角之一的鄧兆尊表示，最近不少朋友因何家爭產，致電給他調侃。鄧兆尊坦言與何家淵源深厚，早年何鴻燊與葉漢、葉德利及霍英東投得澳門賭權時，其父親鄧永祥亦投資了一份，是澳娛最早期股東之一：「其實我真係唔可以講得太多，除咗同大房唔係好熟之外，我同二房、三房同四房都好熟，同超儀更加係好朋友，我可以講咩呢？」

冇勾起不快回憶

鄧兆尊坦言父親在世時，賭王已購回其所持股份：「爸爸賣番晒畀何生，至於嗰啲股份之後再轉讓畀邊個，我哋就冇再跟進，淨係知當年爸爸佔66分之1嘅股權，好似賣成億幾。（今次爭產事件勾起唔開心嘅回憶？）冇！人要進步，冇回憶！要接受新挑戰，我媽咪同我都接受咗新挑戰！阿媽依家咪好似老竇以前對我咁囉！軟皮蛇。」談到對何家事件的看法，鄧兆尊說：「話得係賭王，佢自有辦法，佢嘅決定冇人阻擋，年紀大、心水清。」至於是否認識何超儀老公陳子聰，有否聽過《揸緊中指》一曲？鄧兆尊笑說：「睇身形就知我哋唔識啦！佢咁大隻！」

不停「No Comment」

另一邊廂，陳子聰偕組合廿四味及莊思敏等前晚出席法國酒牌活動。陳子聰狂隊三、四杯烈酒飲到面紅，邊睇貓紙邊在布景板上寫「揸緊中指」，似是呼應太太超儀日前在Facebook上載的《揸緊中指》MV。大合照時，子聰擺出「揸緊中指」的手勢，原本承諾接受訪問的他，完場時竟被公關帶走，要記者再三要求才現身。

對於何家的爭產風波、超儀有份被何鴻燊起訴、是否為支持太太而寫「揸緊中指」、曾否探過外父、有否參與何家的家庭會議、超儀心情有否受影響等，子聰均以「No Comment」回應：「我出嚟做訪問，係因為尊重你哋，I Love You Guys！」但再問到是否「飲好多」及為何「揸緊中指」時，他繼續答「No Comment」：「你哋去睇番首歌啦！我係LMF嘅Fans！（件事未解決前唔回應？）No Comment！」