樂仔流感高峰期一周兩睇急症

香港流感進入高峰期，余文樂（樂仔）因天氣變化導致氣管收縮，一星期內入足兩晚急症室！樂仔前晚出席完Dior騷後更是咳到收唔到掣，最後自行到醫院求醫，以防變成「流感樂」！

樂仔雖然在籃球場上英偉過人，可惜打波打到識飛的他原來是藥煲一名，加上近日香港天氣持續寒冷，在流感肆虐底下，他跟普通人沒有分別，一樣咳到甩轆，前晚更於Dior騷被冷風吹到頭暈，樂仔終於病倒了！

原來輕微哮喘的樂仔已咳足1星期，上周二（25日）清晨近6時在微博自爆染病要到醫院求診，鼻、喉嚨及耳朵都發炎，並上載了一張頭戴冷帽及口罩的相片，並寫道：「午夜病得不能入睡，終於忍受不了，自己開車到醫院去。」據知醫生已診斷他因為氣管收縮，所以很難斷尾！樂仔求醫也未能止咳，好友建議他花數百元買一両特製陳皮，雖然並未立竿見影，但他已沒有再咳，以為陳皮可以藥到病除！

新碟隨時押後

只不過陳皮治標不治本，前晚滿以為咳聲遠離的樂仔，前晚（28日）應邀出席Dior騷，但因為派對在碼頭舉行，樂仔再被寒風一吹，他再度倒下，今次咳嗽比之前更強勁百倍，令他心知不妙，漏夜再往私家醫院輪診。護士見到他也禁不住說：「余生，你都病咗好耐喎！」令他大感冇癮！

本報記者昨日致電慰問樂仔，他表示服藥後已經好了許多：「新嘅一年，我嘅願望好簡單，只係希望唔想病住過年，並且身體健康！」他坦言工作受今次的「百日咳」影響，因為聲沙而未能如期錄音，新碟隨時押後推出。對於流感大流行，為防範於未然，他已做足一切安全措施：「為安全起見，我每日都會帶好多口罩出街，見到助手都會每人派一個，以防人傳人，上車會盡量開窗，保持空氣流通！」