林峯唔Mind繼續Chok

林峯連奪兩屆「亞太區最受歡迎香港男歌星」，惹來不少是非，連近日開Talk騷的詹瑞文都寸他不服眾，難得阿峯仍大方表示冇所謂！

林峯昨日出席大埔超級城《新地喜兔迎新歲》開幕禮，與粉絲大玩遊戲，又不時走向粉絲堆扮兔仔，氹得大家o依嘩鬼叫，非常熱鬧！提到遭詹瑞文揶揄憑Chok樣、冧莊成為「亞皆老街至太子道西」最受歡迎男歌星，還詢問觀眾服不服，結果惹來起哄！阿峯對此不介懷：「唔緊要，以前訓練班都跟過詹Sir上兩星期堂，係好老師！（尷尬？）冇所謂，任何時候都會有唔同聲音，我會繼續努力。」已入紙今年暑假舉行第3次個唱的他表示，今次會增加快歌元素，故將投入操弗身段。

城城遭「斷背吻」

另一邊廂，詹瑞文前晚在Talk騷中扮了多位藝人，邀得郭富城（城城）及張智霖上台湊熱鬧，三人更大跳台灣紅人謝金燕的Hit歌《嗶嗶嗶》舞步，完成後詹Sir竟親吻張智霖，接着向城城埋手，嚇得他四圍閃避！詹Sir即出口反擊：「叫你留心學啦！跳舞同做戲都唔叻！」城城惟有苦笑附和，場面搞笑！至於台下看騷的袁詠儀，更冇好氣回答詹Sir的問題，以笑作罷！