朱紫嬈乘勝追擊瞄準個唱

歌手朱紫嬈（Khole）近日出席了多個音樂頒獎典禮，贏得不少獎項，不過意義最大的莫過於在《十大勁歌金曲頒獎典禮》上，獲「最受歡迎新人獎」銀獎，她更在台上喜極而泣：「攞銀獎已經好開心，覺得自己已經贏咗！我上到台忍唔住喊，因為內心好激動，比起同期新人，我等待嘅時間更漫長！」

向來有作曲作詞的Khole，近來推出親自作曲的處女作品《投影》，榮登勁歌金榜第一位，為她打了強心針，她即將開始錄音工作，希望可於下半年推出新碟，而開個人音樂會是她今年最大的目標：「我會唱自己同人哋嘅歌，我勁鍾意張惠妹，次次唱K都不停唱佢嘅歌，我都希望可以搵RubberBand上台一齊夾Band，不過都要睇吓公司點安排！」

開個人音樂會是朱紫嬈今年最大的目標，她想找RubberBand一齊上台夾Band。