岑潔儀雪地冒險感動到喊

岑潔儀（Zoey）與新男友打得火熱，早前到北海道及韓國共度甜蜜佳節，在雪地上收到男友設計的驚喜飾物，更與對方冒險驅車闖雪地，經歷生死十小時，分外難忘。

岑潔儀（Zoey）與新男友早前到北海道旅行共度佳節，細心的男友在聖誕節正日為她炮製驚喜，令她喜出望外。她甜笑說：「第一次過白色聖誕已經好新鮮，男友仲喺雪地送神秘禮物畀我，係佢自己畫圖設計嘅飾物，我感動到喊。」她除了收到浪漫驚喜外，與男友在雪地歷險十小時同樣刻骨銘心：「我哋由札幌開車去登別，嗰日超大風雪，車程要6個鐘，一直開車都係望唔到路，淨係見到白茫茫一片，真係好驚，我哋淨係敢開到時速20至30公里，最後用咗10個鐘先到。」

韓國掃貨最開心

Zoey去完日本後，還到了韓國，不過就以掃貨及視察衣物批發行情為主：「喺日本就浸溫泉同食嘢，好彩係食魚生多，冇肥到。去到韓國就完全唔同，去咗入貨。」她一口氣掃了20多件衣物，滿足購買欲：「喺日本都冇買嘢，去到韓國就買咗廿幾件衫，最開心係買咗3件真兔毛嘅衫，香港賣幾千蚊，而嗰度唔使一千蚊一件，真係好抵。」