林峯寧賺女人錢拒出賣色相

林峯以七位數字酬勞擔任西裝代言人過肥年！不過，對於赤條條代言內褲，他則耍手擰頭，稱除非有「天價」才會考慮！

林峯昨日在中環出席簽約儀式，以七位數字酬勞擔任西裝代言人，實行過肥年！他表示買西裝一直都有衣不稱身的煩惱，現在能夠度身訂造，既合身又慳錢，相得益彰！他說：「我係易肥易瘦，所以做西裝每次都要重新度身，之前開演唱會體力消耗大，幾乎每場都要改窄褲頭。」

堂妹算半個幕前人

對於不少內衣品牌都有藝人代言，問到可有興趣？林峯說：「我唔係咁適合，之前有個我好鍾意嘅內褲牌子都話可以贊助，但我情願自己買喇！（如果有內褲品牌出天價邀請，會唔會上釣？）咁要睇吓天價成點喇！不過都唔係錢嘅問題，自己唔適合啫！」擔任西裝代言人後，衣着無憂的他希望拍洗髮水廣告！至於外地流行男藝人踩過界拍攝女性用品廣告，林峯笑說：「其實我都接受到，最緊要睇個廣告嘅創意。」

此外，問到有傳堂妹得他介紹加入無綫，林峯說：「佢喺香港話劇團，都算係半個幕前人，但係都唔想講牽涉到屋企人嘅嘢。」