大贏家Eason抱恙清唱 Kay聲帶受損被迫封嘴

謝安琪聲帶受損，接受醫生建議休息兩個月，被迫推掉不少訪問及宣傳工作。無獨有偶，曾與她傳緋聞的陳奕迅前晚出席網站頒獎禮時，亦因聲沙沙，只在台上清唱幾句！

謝安琪（Kay）早前在北京開騷，當時已有沙聲情況，後經醫生證實聲帶受損腫起，但專業的她前晚到大連舉行新碟見面會時，亦堅持唱現場，希望以唱Live報答歌迷，她說：「我都係第一次去大連，呢個地方真係好靚！主辦仲特登請我哋食當地最出名嘅海鮮。」對於聲帶受損，Kay表示幸好情況不太嚴重：「醫生叫我最好兩個月唔講嘢，可能我2、3個月前患咗重感冒，初初諗住好快冇事，加上又要周圍飛宣傳，休息唔夠就病咗！」

經理人介紹針灸師

Kay經理人透露已為她減少工作量，爭取時間休息：「原定嘅演出同宣傳都會照做，惟有平日盡量要佢講少啲嘢，減少啲訪問！（影響農曆年檔期搵銀？）唔關事，我哋向來農曆年都放假。我有個相熟針灸師睇開，而Kay已經好乖戒緊口。」

另外，陳奕迅（Eason）前晚在網站頒獎禮上連奪4獎成為大贏家，他以「熊人」造型示人，精神不俗的他聲沙沙，雖然未有正式演唱，但他亦落力清唱幾句《一絲不掛》，贏得全場掌聲，未知是否為月底在高雄舉行的個唱養聲，其後他未有接受傳媒訪問便離開，帶挈師弟Mr.成為壓軸表演嘉賓。