笑笑口講唔停 婷婷主動攬Chrissie力證老友

早前有指謝婷婷嫌棄周秀娜，不願與她合作，昨晚二人在時裝騷碰頭，婷婷主動伸出友誼之手搭着對方合照，期間更雞啄唔斷，力證冇不和！

謝婷婷、周秀娜（Chrissie）、Cara G.、任賢齊、林莉及泳兒等，昨晚在灣仔會展出席香港貿易發展局舉辦的《香港．華麗秀2011》時裝活動，雖然天氣寒冷，但Chrissie依然穿短裙晒事業線，性感冠全場！

早前有報道指婷婷嫌棄Chrissie愛賣弄性感，拒與她合作，昨晚二人同台鬥靚，婷婷為證明與Chrissie「Friend底」，主動搭着她的玉背笑笑口合照，並說：「唔可以算係誤會，大家都知係假，話我哋唔會同場，但我哋有一齊接Job同上演戲堂，之前首映見到都有傾偈！」她還表示曾介紹男友安志杰給Chrissie認識。現場所見，婷婷與Chrissie不時耳語，問到是否很好傾，婷婷說：「係呀！好耐冇見。（報道影響你人格？）唔會，接觸過我嘅都知我係咩人。」她還透露農曆新年將與男友到日本旅行，但否認預支蜜月。

張舒雅行騷驚仆

同場的林莉則表示，最近忙於在家布置新年裝飾，問到會否擺桃花陣，她笑說：「靚桃花咁大棵未必放到，不過我有鋪紅氈。」收起性感的楊梓榣則為電影《婚前試愛》票房報捷而興奮，並打算買電視獎勵自己，至於買樓大計，她說：「再努力啲，依家夠錢畀首期，但唔夠錢供。」至於陳法拉則表示農曆新年期間將赴美工作，趁機探父母，可惜男友薛世恒因工作關係未能同行。

至於前港姐張舒雅則於下午為IKA BUTONI時裝騷擔任模特兒，首次行騷的她說：「第一套衫要襯對5、6吋高嘅木屐，都有啲擔心，心諗愈驚就愈易仆低，好彩最後冇事！」另外，Chrissie昨午出席另一活動時表示，計劃派數萬元利是，問到何時「真派」，她笑說：「未有咁快，我想保留自己個姓先。」她還表示希望抽空行年宵買桃花：「桃花唔怕多！（男友唔怕？）我可以送畀佢，唔驚！」