超盈代出頭斥無中生有

近日有傳照顧賭王四太女兒何超盈的家傭中六合彩變成千萬富翁，因不捨超盈而繼續留在何家効力。昨日超盈首度開腔否認，直斥傳聞無中生有，更指傳聞令家傭很不開心！

文：　攝：追蹤組

有傳聞指一位照顧超盈多年的家傭去年中六合彩，贏得三千多萬元彩金，因不捨得一手湊大的超盈，即使變千萬富翁，仍照樣留下照顧超盈！對此，超盈接受本報記者電話訪問，直斥報道無中生有：「我屋企冇人中三千萬！我同工人關係好好，冇理由中咗我唔知，如果你中咗，你仲會唔會留喺度做？大家一齊住，咩事都會同我講，就算平時中少少馬都會講，冇可能掩飾而我唔知！（你同工人關係好到點？）好到冇可能中獎而唔講！（傳聞無中生有？）係！」

四太冇聽過傳聞

超盈指該傳聞令家傭帶來不便：「佢哋好唔開心，佢哋係做嘢，唔鍾意高調，熟人都知湊大我得兩個，佢哋去街市買嘢好煩、好唔方便，同埋佢哋可能會畀屋企人誤會，點解中咗獎都唔分畀佢哋，佢哋唔開心我都唔開心！」

至於四太梁安琪昨日再度否認傳聞：「都話唔係！我冇聽過有件咁嘅事！（有指賭王會成日打賞員工？）佢都會，好正常啫！」而賭王孫女何家華昨日接受電話訪問，大讚爺爺對家傭毫無架子：「爺爺話對工人好似屋企人一樣，唔好當佢哋奴隸咁看待，例如工人有病，爺爺同姑姐都會出錢醫，亦會出錢畀工人嘅仔女去外國讀書。節日我哋會同工人食飯，打賞一定有，好似有個工人唐叔咁，由細睇到我哋大，爺爺成日都問起佢，唐叔會由澳門過去探爺爺，傾偈話當年。」

薪酬多達一倍

一位前何家員工則指何家的家傭甚多，因分工合作，相對手頭上的工作不會太多，加上薪金比外面可高達至一倍，故很多家傭到老仍在任：「大房有個管家照顧大太黎婉華好多年，大太過身後，賭王叫管家繼續留任，因為唔捨得佢！」她續說主僕間的人情味比打賞來得更有意義。

另外，賭王何鴻燊向來對人親切友善，毫無架子，超盈亦有乃父之風，前晚與友人在中環太子大廈的SEVVA用膳後，細心安排座駕接送朋友離開。在超盈離開前，另一位名媛榮文蔚與一名型男步出該大廈。