阿Sa睥行William阻示愛

蔡卓妍（阿Sa）與陳偉霆（William）公開戀情後，雖多次同場都刻意避忌，直至前晚出席《勁歌總選》慶功宴才願意合照，問到William為何不再示愛，阿Sa即瞪着他說：「唔好！唔使！」

阿Sa與William前晚率先抵達《勁歌》慶功宴，由於鍾欣桐（阿嬌）缺席，加上同門的古巨基、容祖兒及林峯等未到，William的助手只好暫時坐在二人中間做「電燈膽」。當記者狂影相時，助手尷尬得頭耷耷，William見狀即叫助手讓開，罕有地大方與女友合照。問到William為何領獎時不再向阿Sa公開講「我愛你」，阿Sa反應極大，立即向他瞪大雙眼說：「唔好！唔使！」William即識做地笑說：「當時感覺好意外，嚟唔切反應。（兩個人點慶祝？）依家咪慶祝緊囉！」

仆出廁所攞獎

阿Sa前晚獲頒金曲獎時險失場，她笑說：「坐咗成晚，諗住都冇獎，咪去洗手間囉！點知突然聽到我首歌，即刻撥開人群衝出去，真係可以話係仆住去攞個獎呀！」問到William為何不代女友上台領獎，阿Sa搶答：「我撥開嗰班人其中一個就係William！」另外，對於好姊妹阿嬌空手而回，阿Sa力撐她說：「佢今年開始重新起步，主力拍劇同拍戲，音樂作品唔算多，佢特登喺無錫趕返嚟，係志在參與嘅心態！Twins今年會出國語碟，希望再努力！」

昨日，阿Sa與師弟林峯現身北京，偕李連杰、黃聖依、徐若瑄及文章等出席新片《白蛇傳說》的發布會，席上播放一段長達60秒的花絮，而電影預計將於年底上映。