英皇東亞震怒嬲爆TVB

  • 無綫《十大勁歌金曲頒獎典禮》賽果塵埃落定,但是非不絕,據知楊千嬅失落最受歡迎女歌星獎,令東亞震怒,更沒有按慣例於慶功宴後接受無綫官方刊物訪問;而專誠返港出席頒獎禮的鍾欣桐亦意外地捧蛋收場,令英皇心有不甘!

    東方電視
    更多新聞短片

    無綫與四大唱片公司因版稅風波反面,「四大」歌手緣盡無綫,雖然仍得英皇及東亞力撐,但奈何賽果仍未能令兩間唱片公司滿意。英皇的鍾欣桐(阿嬌)有份角逐傑出表現獎及金曲獎,同時亦以Twins名義角逐最受歡迎組合獎及金曲獎,買重「雙重保險」,可惜仍坐冷板櫈;而英皇亦為鍾舒漫及泳兒力爭唱作人獎及改編歌曲獎,惟雙雙倒灶,令英皇大感冇癮,據知英皇歌手奪獎太多,令無綫「度唔掂」,最後要向部分歌手「開刀」。對此英皇高層吳雨說:「冇唔開心,公司對Twins有信心,惟有繼續努力!(太多獎分唔掂?)自己以前喺無綫做,明白要平衡!」

    搞完慶功即閃拒受訪

    而東亞亦派出日本勁旅EXILE、黎明及周慧敏撐場,可謂畀足面,惟千嬅最終未能蟬聯「最受歡迎女歌星」獎,而BIG FOUR亦緣盡「亞太區最受歡迎男歌星獎」,何韻詩更捧蛋收場,賽果令東亞大為震怒,千嬅出席慶功宴後更沒有按照慣例,聯同其他「最受歡迎歌星」得主容祖兒、林峯及古巨基,接受無綫官方刊物訪問;而BIG FOUR之一的許志安亦缺席慶功宴,似作無聲抗議。

    對此,東亞董事陳志光表示千嬅要趕往與EXILE餞別,故沒有接受無綫官方刊物訪問:「可以約時間再影。(BIG FOUR冇亞太?)四個好難齊人,明白TVB唔嚟冇獎!(無奈接受?)冇辦法。(滿意賽果?)可以接受,我哋應該攞嘅獎都差唔多。」而首奪「亞太女歌星」及合唱歌的千嬅在慶功宴說:「攞晒TVB啲獎,可以收工。(唔再攞?)唔敢。(峯哥帶挈你?)我對自己有信心,拍住峯哥更有信心,林峯係我吉祥物,同佢拍戲我攞影后。(金曲金獎好意外?)首歌好多人點擊,應該畀機會新人。(黎明出席換獎?)首歌Hit先講得。(你喺Amusic時黎生冇咁出力?)佢出錢買全版廣告!」

    祖兒重奪歌后開香檳

    至於重奪失落兩年的「最受歡迎女歌星」獎,祖兒開心地說:「冇諗過,好似拎咗5年係人生極限!」她透露由昨日開始放假2個月,問到有何放假大計?她說:「環遊世界,有諗過進修!」祖兒留守至最後一刻才離開,在門外守候的歌迷,為祝賀祖兒六度奪「最受歡迎女歌星」獎,花盡心思送祖兒六支香檳,而祖兒更在車上興奮地向歌迷噴香檳。

    專案組

    心情靚爆的祖兒開香檳及喪飲香檳,與歌迷分享喜悅。

    千嬅首奪「亞太區最受歡迎香港女歌星」及「合唱歌曲獎」,笑言已攞齊TVB的獎項。

    大豐收的阿Sa(左起)、陳偉霆、祖兒、基仔及林峯晒冷出席慶功宴。

    祖兒的粉絲舉起橫額,恭賀祖兒重奪「最受歡迎女歌星」獎。

    RubberBand(左起)、張繼聰、側田(右)等金牌大風歌手撐慶功。