主音Glenn帶囝囝做逃學威龍
美國搖滾鄉謠班霸Eagles將於3月18日重臨香港,樂隊最近到澳洲演出時,主音Glenn Frey接受本報獨家專訪,自爆兒子會陪他巡唱而逃學。
記:記者 G:Glenn Frey
記:你哋四個把聲同70年代時一樣雄渾,係點樣保護聲帶呢?
G:把靚聲係樂隊嘅標誌,覺得好彩,仲可以高水平唱歌,但冇刻意護聲,我唔食煙、有健身同食得健康,只係間中飲吓酒。
記:你喺台上稱呼Don Henley(曾鬧不和的鼓手)做好朋友,你點形容你哋依家嘅關係?
G:以前我哋以樂隊行先,經常見面飲酒,依家變成工作拍檔,當你各自有家庭同仔女係好自然嘅事,我哋嘅工作關係好健康,好享受巡迴一齊嘅日子。
個人碟唱老歌
記:你成二十年冇出個人大碟,有冇計劃再出?
G:我同Don都籌備緊個人大碟,我打算推出翻唱20至40年代經典嘅情歌集,今年稍後會推出。
記:你客串過電影《甜心先生》,仲有冇興趣拍戲?
G:我鍾意演戲,嗰次係導演金馬倫高爾打畀我,想搵我演個小角色,我通常都係等電話,而我個大女都喺大學讀緊戲劇。
難忘港式美食
記:你十幾年前來港開過個人演唱會,仲記唔記得?
G:我嚟過香港幾次,好鍾意,啲餐廳食物好好食,香港變化真係大。(聽講當年你去灣仔酒吧,因着冇領衫被拒入場喎?)哈哈,我唔記得喇!係咪真?
記:你哋三月初會首次去內地(上海同北京)演出,有咩期望?
G:我從未去過內地,覺得好興奮,到時會做遊客四圍去,我八歲個仔扭計要我帶埋佢去,咁到時可能逃學一個禮拜!