傅穎覓老伴跨過傷情路

「留得青山在、哪怕冇柴燒」，這個道理能在傅穎身上深深體會，入行8年來，愛情、事業屢受挫，經常與緋聞、不和等是非扯上關係，面對攻擊聲音及矛盾感情，她堅持抱打不死的精神繼續站在娛樂圈舞台，堅信愛神邱比特總有天會眷顧她！

愛情追求完美

處女座的傅穎（Theresa）是完美主義者，愛情觀亦一樣，不想「只在乎曾經擁有」。雖然曾遇上感情騙子，但她仍充滿憧憬︰「我梗係追求愛情啦！我相信事業同愛情可以並存，每個人都需要愛情。」無奈世事甚少兩全其美，若要二選其一，她心中早有答案︰「我以前會揀事業，依家就揀愛情！有邊個唔想有個好溫暖嘅屋企，同鍾意嘅人分享喜同悲？其實人生去到最後，都係想身邊有喜歡嘅人陪住啫！」

大部分女孩的Mr. Right都是靚仔或有錢，但Theresa抗拒快餐式戀愛，認為靚仔冇安全感︰「我鍾意嘅唔一定要靚仔，亦唔使大隻，我唔係拍散拖嘅人，最怕係花弗、好鍾意去玩嘅男仔！」為了保護戀情，她希望低調地愛︰「如果我拍拖唔會公開，呢啲係我哋兩個人嘅事，其他人嘅聲音會影響到我哋嘅關係。」

緋聞早已看化

信愛情不一定得到愛情，Theresa入行8年以來，煲水新聞多的是，幸她早已睇化︰「傳緋聞好過傳是非，我傳來傳去都係嗰幾個，唔會介意，因為唔會影響到我。」近來最熱烘烘的緋聞，絕對是同公司的「巨胸謙」羅仲謙，一個是宅男女神，另一個則迷盡妹妹仔，甚為匹配！可惜上月，Thersea突然與謙仔劃清界線，更寸他「講嘢冇句真」！受訪當日仍與謙仔Sweet Sweet的Theresa，談及對方時面帶笑容︰「佢唔係生於呢個年代嘅人，好似佢識唱嘅歌都係啲好舊嘅歌。」可見二人當時關係甚佳，她還補充說︰「佢畀人一種好鍾意玩嘅感覺，但其實佢唔係，佢為人都好踏實。」也許愛情就是矛盾，「當局者迷」的道理，從Theresa身上可以看到。

事業轉變求生

感情未有着落，事業亦要重新出發，02年入行的Theresa，多年來歷盡起跌︰「有兩年唔知自己做緊乜，之後轉形象有好多聲音，我唔肯定自己做嘅嘢啱唔啱，加上走音事件同轉新公司，高低起跌齊晒！」「平步青雲」四個字與Theresa扯不上關係，在舊東家負面新聞不絕，令她毅然轉投新公司星皓︰「選擇離開，我諗得好清楚，唔會後悔！」可惜黑氣未有離開，去年準備出碟之際，Theresa的聲帶突然有事，令她一度想放棄︰「之後情況變得更差，有諗過唔做呢行，我係一個緊張事業嘅人，當時真係好無奈。」

雖然是非無止境，但她從沒後悔入娛樂圈︰「雖然辛苦，但學到好多嘢，呢行係社會縮影，比其他人睇得更多。」為求生存，Theresa不停蛻變，由從前的短髮清純Look變成金髮大眼娃娃，處事亦變得謹慎︰「最大轉變係珍惜眼前嘅嘢，睇嘢清楚咗，以前性格好衝動，做任何嘢都唔會放慢腳步，覺得自己做嘢唔可以Hea，要做到最好。」

姊妹引發是非

02年由9位青春無敵女孩組成的Cookies，剩下4餅後再拆夥，與Theresa共事最久的是楊愛謹、吳雨霏及「宿敵」鄧麗欣（Stephy），Theresa坦言大家並非密友︰「大家一齊經歷好多，十幾歲一齊入行，係陪住成長嘅人，回憶係好特別。不過大個各自發展，好少聯絡同約出嚟，只係有時玩吓微博。」對於經常與Stephy扯上關係，Theresa顯得不願多談︰「點解個個都問我同佢嘅嘢？我覺得兩個人擺埋一齊講就係是非，我唔知要維持幾耐，但都睇化咗。」