生日狂擦三個蛋糕 傅嘉莉食到口軟

模特兒傅嘉莉早前生日，最開心是獲公司安排做月曆的一月女郎，並與好友狂食慶祝！踏入2011年，她更滿腦大計，希望戒掉一切壞習慣！

本月6日生日的傅嘉莉（Kelly），日前忙着與好友慶祝，食了三個特色大蛋糕，認真食到「口軟」。提到最大的生日禮物，她透露是能在公司的月曆中擔任一月女郎，她說：「因為公司有好多其他國籍嘅Model，我係其中一個香港代表，好榮幸，而且我被安排喺我生日嘅一月，零舍開心。」最近她更連收七隻同一系列的兔公仔作為禮物，令她十分驚喜：「我收到第一對之後開心到放上微博，跟住好多朋友就送埋其他款畀我，我依家會輪流帶佢哋出街！哈哈！雖然年紀大咗，但心境好似愈來愈年輕咁！最緊要樂天吖嘛！」她又感激透過不同形式送祝福的好友，亦很意外有不少海外Fans祝她生日快樂。

誓要叮走壞習慣

踏入新一年，Kelly定下目標，她希望同時兼顧模特兒及演員工作：「嚟緊會去日本做嘢，仲想試吓去唔同地方工作，另外舊年同劉青雲合作拍戲，學到好多嘢，希望新一年有更多新嘗試，演多啲唔同嘅角色！」除了想工作接不停，財源滾滾來之外，Kelly亦誓要叮走壞習慣，她說：「首先要戒夜瞓嘅習慣，同埋做多啲運動，之前玩遊戲Check到我體質竟然係45歲。仲有我做嘢就好準時，但約朋友就成日遲到，我都知要改。」