趙哲妤做乖女洗紋身

中國小姐大賽香港賽區五料冠軍趙哲妤（Uny）為做主播而奮鬥，想走才女路線的她，抗拒成為賣弄身材的「材女」，並打算洗走尾龍骨上的紋身，誓做內外兼備的乖乖女。

女子組合Jelly Girls成員趙哲妤（Uny）曾參選《2010中國小姐大賽》，大熱當選成為香港賽區的五料冠軍，令她分外驚喜：「傳媒封我做大熱，但我成日諗大熱倒灶，以為冇獎。」她在決賽中刻意拉高泳褲遮尾龍骨上的紋身，並承認後悔年幼時衝動，幸而未有影響參賽：「係16、17歲時候紋嘅！當時紋到一半就喊，依家做娛樂圈又唔係咁方便，可能着衫少咗彈性，工作少啲，都想洗走佢，但怕痛。（冇影響比賽？）評判覺得我態度正面，當初只係因為偶像張栢芝喺同一個位置有紋身而紋。」

渴望拍電影做主播

Uny勝出比賽後積極爭取電影試鏡及到山區進行親善探訪，談到會否為藝術犧牲半裸上陣？她說：「唔會，比堅尼已經係我底線，都要同屋企人傾。」她現時修讀商科及新聞系學士課程，坦言介意賣弄身材，反而想成為才女：「目標係做主播，睇吓中國小姐比賽有冇呢個機會畀到我，我想似才女，唔想騷身材，靠呢啲搵唔到好多錢。」