默默耕耘不搞緋聞 潘瑋柏：唔係事實點做

台灣歌手潘瑋柏默默耕耘，從不搞緋聞的他，雖有人建議他搞緋聞，但遭婉拒，他說：「唔係事實點做？」

潘瑋柏剛拍罷內地劇集，隨即要宣傳新專輯《808》，對於近年不少藝人為提升人氣而製造緋聞，他透露曾有人提議他搞緋聞：「緋聞係幫到人氣，但唔係拍拖點能夠一齊出街，我覺得最緊要做好自己同工作。」實事求是的他笑言是緋聞絕緣體：「出道咁耐只係得幾段緋聞。」

忙得不可開交的潘瑋柏笑言沒有時間識女仔，他說：「最大機會識女仔係喺工作時候。（有目標？）未有，要認識同了解咗先會追對方，依家太多工作好難拍拖。」曾表示希望35歲做爸爸的他坦言不心急，雖然現時30歲，但仍抱着順其自然態度，他說：「等緣分到，希望有朝一日可以同個仔父子裝出街。」

領養小朋友

潘瑋柏表示兒女不一定要親生：「可能好似畢彼特咁領養小朋友。（家人接受？）冇關係，最緊要係我自己係咪做好心理準備，係咪有時間去照顧個小朋友。」而他亦希望趁今年入行十年可在港舉行音樂會，他說：「好多地方都開過演唱會，唯獨香港冇搞過。（想紅館開個唱？）唔一定，一千人同三千人場地都想開。」