陳霽平出書爆圈中人情冷暖

活躍於主持界的陳霽平（Maria）曾出版英語教材，她透露今年籌備出書「大爆」圈中人情冷暖，但主要以圈中趣聞為主：「外行人成日以為娛樂圈好多是非，但其實都有好多趣事嘅！」那有否「嘗」過圈中的人情冷暖？她亦不諱言：「我啱啱出道時同一個朋友一齊主持，我想請教佢一啲嘢，點知畀佢耍走咗！反而另一個唔熟嘅前輩教咗我好多，其實我都幾感慨！」

新一年新作風，Maria透露今年的新目標是戒夜瞓：「我希望以後可以喺12點之前瞓覺，早瞓唔止可以健康啲，人都靚啲吖嘛！」談到今年初到澳門主持活動，對她而言增添「一點」難度：「因為個騷係要講普通話，咁我最叻係英文，其次係廣東話，不過普通話都可以嘅，最緊要係啲人名唔好讀錯啫！」

不畏寒風的Maria早前穿着露膊裝在澳門主持活動。