諸葛梓岐汪圓圓扮靚冇時停

名模汪圓圓主演賀歲片《最強囍事》，與諸葛梓岐合作後成為好友。農曆新年將至，二人各有節目。單身的圓圓將在北京拍攝電影，而梓岐則與母親到外地度歲，回港再到男友家拜年，十分忙碌。

諸葛梓岐與汪圓圓皆是電影圈的新寵兒，她們在電影《最強囍事》中雖是首次合作，但已甚有默契，由於合作前已經相識，加上大家都貪靚，不用埋位時便大談化妝扮靚，故更易於交流及增進友誼。農曆新年將至，梓岐表示會先與母親到外地旅遊：「因為我家人好着重過農曆新年，每年都一齊過。（男友家庭方面？）佢哋都好傳統o架！都會去佢哋屋企食飯同拿利是，最重要開開心心。（你咪好忙？）係o架！兩邊都係傳統家庭。（點安排時間？）兩邊穿來穿去囉！喺香港就冇問題，否則會令時間分配唔到。」為了與母親旅行，她一早已向公司請假，並表示要提早收爐。

不介意搵圈中男友

而汪圓圓雖未有男伴，但不愁寂寞，有工作和家人相陪，她表示農曆新年將到北京與姐夫甄子丹合作拍電影：「家人都好傳統，好重視農曆新年，細個會同家人一齊包餃子同食餃子。雖然今年要喺北京工作中度過，但希望屆時家姐汪詩詩能到北京探班同姐夫一齊過年，咁都可以一家人團聚，開開心心過年。」

問到有否希望在新一年找個男友，她坦言工作忙得不可開交，至於是否對圈中人不作考慮，她說：「以前係o架！但依家想法轉變咗。（因為圈中好多男仔好好條件？）都係嘅！因為覺得最重要係對方有上進心同畀心機工作，不過依家都冇時間諗咁多，順其自然啦！」