君如練性愛瑜伽畀古仔銀親

在影圈打滾多年的吳君如，雖然見慣風浪，卻被區區一場性愛瑜伽戲難倒！她笑言與拍檔古天樂的身體部位「黐得太緊」，令她尷尬不已！

君如與古仔在電影《神奇俠侶》再度結緣，劇情講述二人扭盡六壬「啤番件」，甚至隨時隨地也想做愛。雖然事前已有心理準備，豈料甫開工便要拍攝性愛瑜伽場面，令「心口有個勇字」的君如大驚，最後還是順應監製老公陳可辛要求就範：「有啲瑜伽係夫婦一齊做，促進血液循環，所以拍嗰時大家都要黐得好埋，但有啲動作好尷尬！有一招係古仔從後攬上嚟；另一招就係我隻腳翹住佢個頭，之後喺咁碌！（古仔有冇生理反應？）哈哈，有就好喇！當年拍《金雞》，陳奕迅同我講過有反應。雖然佢着內褲，但我唔會刻意望囉！咁咪證明我有魅力囉！」

孖陳可辛分享閨房樂

雖然有位「監製愛人」，但君如並未獲優待，更踢爆陳可辛曾嫌她演出不夠放。未知是否受男友「激勵」，君如拍照時異常投入，當坐在木箱上的古仔翹手冧笑時，她不斷使出冧仔三招「攬、箍、掃」，場面爆笑：「我覺得佢驚同其他女演員演得放會傳緋聞，但我就一定唔驚，好放心！」至於古仔為投入角色，不時與陳可辛分享閨房樂，故與君如親熱戲時，即使對方在場亦不尷尬。對於《神》片的親熱戲由君如主動，問到會否覺得蝕底，他笑說：「唔好講到咁，係佢蝕底畀我！」

此外，曾參演《十月圍城》的台灣演員王柏傑笑言，起初以為獲安排他飾演搞笑角色，豈料最終挑戰大反派。面對不少動作戲，他坦言開始時不太適應，幸前輩古仔及君如給予意見教路。