Yumiko出碟學舞再戰Sing途

去年鄭希怡（Yumiko）長駐內地拍劇，瘋狂吸金百萬元，絕對是豬籠入水過肥年，新年伊始，她有滿腦子大計，計劃遠赴外地學跳舞、學廚及推出新EP！

去年Yumiko隻身前往內地拍攝四套電視劇，穩袋七位數酬勞，難怪她表示過去一年過得非常開心及「充實」：「開心識咗一班好朋友，拍劇期間亦學到好多新事物，所以好充實！」農曆新年將至，Yumiko已定下新目標，她說：「我希望出一隻EP，又想抽時間去美國或韓國學跳舞自我增值，因為我已經好耐冇真正跳過舞，希望藉住今次機會學習新嘢，唔想生疏！」

佩服栢芝煮大餐

而Yumiko又希望學廚，但否認是為了箍實男友，她坦言女人應懂得「煮番兩味」：「好似之前喺內地拍劇，栢芝上咗嚟探班，佢一個人煮九個人嘅分量，仲煲埋湯，我真係覺得佢好犀利！」她自認煮嘢食麻麻哋，故要努力鑽研：「冇理由下下要人煮畀自己食嘛！」

問到去年長駐內地拍劇，男友曾否投訴被冷落？Yumiko說：「唔會！一段關係唔使成日見，每個人都應該有自己嘅私人空間，如果每日都見住，反而仲辛苦啦！」與男友Andy拍拖六年，問到會否秘密結婚？她說：「呢幾年仲係事業搏殺期，結婚對我嚟講好長遠，亦唔知會唔會秘密結婚，結婚先算啦！」