《勁歌總選》黎明畀面蒲頭

全城矚目的《十大勁歌金曲總選》明晚舉行，適逢《勁歌金曲》30周年，無綫專誠力邀一眾巨星大唱經典金曲炒氣氛，惟因無綫與四大唱片公司的版稅糾紛未解決，令挑選歌手具難度。據知，早前寸爆商台及港台頒獎禮的黎明，答應任表演嘉賓，雖然極具賭氣成分，但同時亦能帶挈旗下歌手衞蘭及JW等攞獎。其他嘉賓包括日本勁旅EXILE、周慧敏、關淑怡、呂方及倫永亮等。

至於《總選》司儀一職亦多災多難，崔建邦涉嫌停牌期間駕駛遭停工，曾志偉因家事急返台灣，故無綫臨時拉伕找來「福祿壽」阮兆祥、王祖藍及李思捷，正在多倫多登台的祥仔說：「擔心冇時間度橋唔夠搞笑，希望觀眾見諒！（同『師傅』志偉通過電話？）有！聽得出佢心情沉重，希望佢阿爸冇事，我哋『福祿壽』全部都撐佢身體健康！」

EXILE獻Sing冧港女

另外，嘉賓之一EXILE昨日抵港，但主音ATSUSHI因工作稍後才到達。EXILE出閘時大晒親民，面對近百歌迷送花及禮物，均以簽名「回禮」，並大讚港女「Very Good」！