欣宜處女簽唱會又喊又笑

剛推出首張個人專輯的鄭欣宜，昨日舉行處女簽唱會，吸引半百Fans排隊，有Fans送上鮮花及手製禮物，祝福她早日達成個唱夢，令她感動落淚！

欣宜（Joyce）昨日身穿酒紅色皮褸出席新碟宣傳活動，吸引近200名市民企滿商場兩層圍觀，不少Fans更高舉紙牌支持，令她十分感動，並說：「冇諗過有咁多Fans支持，好開心！」問到父親鄭少秋有否以行動力撐，她說：「佢訂咗一隻，而且上次發布會，佢都有抽時間趕去支持，我覺得好感動。」

領養兔仔圓夢

Joyce即場獻唱3首歌，並要求台下Fans與她一同大叫「Encore」，全場High爆！其後的簽名會則吸引半百Fans排隊，有Fans送上鮮花及手製禮物，令Joyce受寵若驚，更激動得攬着Fans落淚，她說：「希望可以快啲搞到自己嘅Fan Club，正式同Fans搞聚會之餘，仲可以逐一多謝佢哋！」肖兔的她還即場領養一隻兔仔，希望新碟大賣：「其實想養寵物好耐，但一直揀唔啱，我好鍾意兔仔，可以領養好開心。」