志偉斥崔毀誠信今次好難幫

涉嫌停牌駕駛的崔建邦（Amigo）繼續「人間蒸發」，兩位「恩師」曾志偉與陳志雲昨日先後出席公開活動，未有如上次般力撐之餘，還擺出一副半放棄態度！志偉到愛民邨為新片《我愛HK開心萬歲》派禮物宣傳，吸引逾百街坊圍觀，當提起Amigo時即說﹕「都估到你哋會問，今次阿邦好難幫，佢之前仲喺我面前話做番嘢會珍惜機會，同唔會再犯錯，估唔到轉頭又咁！」

有需要會代求情

志偉雖沒有正面回應是否對Amigo感失望，但明言今次「冇得原諒」：「佢冇搵我，我亦冇搵佢。呢個時候佢要靜吓同三思，諗清楚日後條路點行。（鬧佢？）咁要睇吓佢幾時打畀我喇！如果係當日梗會鬧啦！（幫佢求情？）年輕人係要畀機會，如果真係搞到上法庭都會嘅。」

至於出席慈善步行的志雲，談起「愛將」Amigo時已不再力撐，更「降呢」到普通朋友之列：「從來都只係朋友同同事，『愛將』係你哋（指記者）填上去啫！（佢請假？）我知，但我唔理得藝員部嘅安排。（點睇佢一錯再錯？）佢喺件事都冇發過言，箇中情況唔清楚，我亦冇過問佢，只係傾過偈。（律師話如果真係可能會坐監？）冇提過呢件事，只係講近況，私事亦唔方便公開講，佢心情都冇乜嘢。」

承認搬走避風頭

對於Amigo似乎不太珍惜前程，志雲說：「我唔方便評論佢有冇闖禍。（對佢失望？）朋友喺呢個境況都應該支持同慰問。」他坦承Amigo怕崔媽媽被追訪，已搬往朋友家暫住。至於崔媽媽的車仔麵檔昨日繼續營業，但未有見她坐鎮。

同場出席《我》片派禮物的施念慈旗下四模Lillian、Iris、Bambi及Ivy有份客串，飾演「自己」當模特兒，四人大呼好玩。Iris自爆日前伸手拿取放在枱上的漢堡包時，不慎撞傷左眼眉，幸好不需縫針，最怕面留疤痕。