Baby自設私竇服侍曉明

身為「80後小富婆」的Angelababy，昨日穿上性感Tube Dress為有份投資的美甲店剪綵，她笑言開「私竇」為方便修甲及招呼朋友，問「男友」黃曉明是否免費修甲，她甜笑說：「佢有好多贊助！」

近年愛情事業雙贏的Angelababy，入行短短幾年已在中、港、日三地順利發展，更與「億萬國產男友」黃曉明拍戲拍廣告搵真銀，火速成為「80後小富婆」。最近她更在商界大展拳腳，與友人合資搞扮靚生意，順便做自己「私竇」。

自認體貼女友

昨日Baby穿上Tube Dress為新店M：Home舉行開張儀式，雖然「男友」黃曉明不在身邊，但首次做老闆娘的她，有母親、經理人Kim和師妹楊汀叮撐場，心情勁興奮，風騷滿場飛。Baby不時大晒手上靚甲，更自爆首次開舖投資近百萬元，又表示會經常落私竇打躉，擺明搵自己做生招牌：「因為自己成日唔喺香港，一返到香港就想修甲，但成日太夜Book唔到，所以索性開舖方便啲！」問到預計何時回本，她即顯出小富婆本色：「冇諗呢啲，最緊要係可以整甲，同埋有個竇畀朋友喺度玩。」

而Baby「男友」黃曉明是內地一線小生，有傳身家億萬，問到可有請教男友投資之道，她只一味甜笑，又謂不想每次提起男友：「唔好講佢啦！其實朋友嚟都可以唔收錢或者有折，睇吓有幾Close。（曉明係咪唔使錢？）我諗佢有好多贊助。（你贊助佢？）唔好講佢啦！如果男仔係咁（整指甲）我就驚。（搵佢做代言人？）不如唔好講佢啦！唔想次次出嚟都講佢。」隨即將話題轉到不相熟的羅志祥身上：「有個店員心願係幫小豬（羅志祥）修甲，自己好希望幫佢達成心願。（你識小豬？）我唔係好識佢。」

至於日前與曉明在內地游泳相在網上流出，Baby說：「不如唔好講佢啦！我都冇游水。（你係體貼女友？）係嘅！（曉明話可以等女友一世，係咪好Sweet？）好喇！我哋依家跳出呢個話題，唔想每次出嚟都提第二個名。」

楊汀叮想賣雞蛋仔

同場的楊汀叮透露今次不收酬勞幫Baby擔任代言人，她笑言會屈Baby給股份，問到是否想做生意，她說：「好想，身邊朋友開始做生意，首先努力搵錢，最想開雞蛋仔同夾餅店，因為本身鍾意整，蛋糕都鍾意整。（擺蛋糕寄賣？）都有諗過o架！」