金剛森美愛爆肚鬥放笑彈

今屆全球華人新秀歌唱大賽邀得森美及金剛做主持，口才了得的森美加上半鹹淡廣東話的金剛，擦出不少火花！

森美表示首次見到金剛是擔任《獎門人》的主持：「記得佢嗰日發燒，但一埋位就可以又玩又跑，真係好犀利，好佩服！佢嘅主持技巧同應變能力好高，可以接到志偉講嘅嘢喎！TVB暫時係無人能及！哈哈！我畀滿分佢呀！」

金剛透露以前收看過森美的節目，大讚對方的反應和應變能力很快，故擔心大家合作不會有火花，但效果令人意外：「森美反應快，經驗多，好有火花同默契。我哋兩個好容易就可以製造出一啲笑話，例如Potential（潛質）講做Potato。佢又會笑我講廣東話唔正，我想講歌手，點知講出嚟變咗做家嫂。咁我哋呢啲位令到台下觀眾好開心，氣氛好好。但佢有個缺點我唔鍾意囉！就係佢講嘢太快，我聽唔切呀！哈哈！」

冇興趣主持港男

森美坦言賞識這位好拍檔，覺得他的市場可以發展到內地：「我哋兩個係『美金』二人組，依家我哋最犀利！」問到會否有意破天荒一起主持「香港先生」選舉，兩人即耍手擰頭，金剛說：「梗係唔要啦！我哋兩個咁鍾意搞笑，一見到啲男人就冇晒意欲去搞笑喇！」在旁的森美捧腹大笑，希望金剛將來主持普通話節目時，邀請他做嘉賓，屆時可以反笑他的普通話只得半桶水，再大放笑彈！