廖碧兒32歲生日雙豪冇影

近期負面新聞多多的廖碧兒昨日生日，有傳與「億萬富少」林忠豪極速分手的她，未知是否在雙「豪」皆失下，連送蛋糕的型男也不放過，她說：「呢份係我生日禮物？」

廖碧兒與「億萬富少」林忠豪的戀情被踢爆不久，有傳兩人已極速分手。昨日32歲生日的廖碧兒下午出席品牌活動，大會安排外籍型男送上生日蛋糕祝賀，廖碧兒見猛男即笑騎騎說：「呢份（指型男）係我生日禮物？」

廖碧兒透露昨日在工作中度過，問到可會與緋聞男友慶祝？她說：「同屋企人慶祝，以往都冇乜機會同佢哋慶祝生日。」至於是否與林忠豪甩拖？廖碧兒避忌地說：「我都係睇雜誌咁講。（收林忠豪生日祝福電話？）未收到佢嘅電話喎！」問到陳豪可有祝賀？廖碧兒前言不對後語說：「冇喎！係未知，電話唔喺身，今日都仲未完吖嘛！」似乎心亂如麻，再問她是否希望收到陳豪祝福？她說：「渴望收到更多朋友嘅祝賀。」

與陳豪口供唔夾

廖碧兒近期主演的兩套電視劇收視麻麻，她說：「因為之前長假期啫！處境劇有25、26點都幾高吓。」活動後，廖碧兒登上由父親駕駛的七人車返回中環嘉兆臺住所，半小時後再前往寶翠園，廖碧兒下車後見有傳媒追訪即煞有介事說：「呢度係私人地方嚟！」又着保安員阻止傳媒採訪，而廖碧兒進入大廈後即不知所終。陳豪昨晚出席BMW X 3活動，問他為何未祝舊愛廖碧兒生日快樂？他說：「有Send電郵畀佢！可能係佢未Check！」他表示不會補發短訊亦不會送生日禮物，現在感情生活是等運到，但覺得Very Good：「新一年新開始，重拾自我！」活動後，他即返回寓所。