湯怡跪地按摩 洪卓立嗒糖

緋聞情侶洪卓立（Ken）和湯怡（Kathy）日前拍拖血拚，Ken既幫女友挽手袋又負責畀錢買褸；Kathy則蹲下為Ken按摩膝頭，令他High到「震」，還互餵甜品，煙韌到爆。

正所謂「近水樓台先得月」，有見同門的陳偉霆及蔡卓妍公開戀情，師弟妹洪卓立和湯怡亦想有樣學樣，「雙K戀」亦逐漸明朗化。

由於Kathy要往內地拍劇，為免與Ken兩地相思，日前即爭取時間到奧海城拍拖Shopping，兩人身穿灰黑色情侶裝，相當合襯，但行得離行離列，顯得相當避忌。

兩人走進時裝店挑選Kathy的禦寒厚衣，雖然是女裝部，但Ken非常有耐性，又為女友挽手袋，Kathy選中一件豹紋大褸後，Ken即為她試穿，又不時「蜜」斟，最後Kathy揀了數件厚褸，Ken亦識做地付款，盡顯風度！之後兩人到玩具店睇公仔，再到藥房，聽店員講解一輪，最後買了數包藥離開。

Ken與Kathy其後往祭「五臟廟」，但幾乎有情飲水飽的兩人只叫了甜品，期間又玩互餵，你一啖我一啖，Sweet到爆！吃飽後，兩人走到按摩產品專門店，試用按摩椅及「揼揼帶」，期間不時打情罵俏，Kathy幫Ken按肩又整理頭髮，還蹲下用小型按摩器按男友膝蓋，令他High到「震」，最後兩人買了「揼揼帶」，滿載而歸。

陪買藥傍身

事後記者致電Ken，他對戀情不置可否，但言談間對Kathy關懷備至：「佢依家喺內地拍劇，平日都喺MSN保持聯絡，嗰邊天氣好凍，我幫佢買咗暖氈叫助手帶過去。（買藥？）無錫嗰邊咁凍，佢容易鼻敏感，買啲藥粉畀佢。」他表示揼揼帶是買給媽咪的，但問到Kathy為他按摩是否很爽時，他即笑說：「好鬼痕，膝頭位置有啲敏感。（你幫佢挽手袋？）冇乜所謂。」