趙世曾派片自薦做伴游

趙世曾揚言要教中國小姐游水，更派卡片及聲稱介紹唱片公司給她們，難怪冧死女。

花花公子趙世曾前晚繼續在趙家大宅設晚宴招待《2010中國小姐大賽》候選佳麗，兒子趙式正、貝安琪與母親劉香萍、蔡慧敏及大賽總組委會執行主席伍小平亦是座上客。當(1)陽金津大讚趙宅泳池漂亮，可惜自己不懂游泳時，向來冧死女的趙世曾即打蛇隨棍上：「我教你游水，包保三日學識，學唔識我畀番一萬蚊你！」隨即向佳麗派卡片，並續說自己教人無數：「我教過幾百個人，不過女仔比較多！兩個仔都係我教，但佢哋冇我游得咁好，打籃球都冇我咁叻！」

其後，他們移師另一間房唱卡拉OK，在香港賽區憑唱京劇勇奪才藝獎的(24)曹越，應邀獻唱，歌喉獲趙世曾激讚：「你唱得仲好過依家啲歌星，我真係要介紹你畀英皇！」氹得曹越頻頻甜笑。

冇規定泳衣陪食

此外，佳麗昨晚出席《兩岸四地共融愛心晚宴》，角逐「最佳才藝獎」、「卓能最具時尚獎」、「最佳公益形象」及「最具觀眾緣獎」，評委趙世曾甫到場即為前日要佳麗穿比堅尼陪食午餐澄清：「我同大會冇規定佳麗着泳衣食飯，況且我屋企開咗好大暖氣，冇人話凍親！我哋冇畀利是佳麗做平頂儀式，係因為佢哋未選出嚟，唔可以收利是！」