大東搵保安開路篤魚蛋冧師妹

台灣組合飛輪海成員汪東城（大東）一向是萬人迷，原來私底下冧女亦有一手！日前他來港出席活動後，秘密約師妹糖兄妹成員Kandy行街掃貨，不但化身形象顧問為師妹揀選頒獎禮的戰衣，事後更雙雙篤魚蛋！

大東日前於尖沙咀出席其品牌的時裝活動，適逢邀得師妹Kandy擔任司儀，活動結束後，他相約Kandy到附近逛街。雖然Kandy集中火力行女裝部，難得大東沒有嫌悶，當他得悉Kandy為準備頒獎禮戰衣而頭痛時，即自告奮勇充當形象顧問。二人在時裝店內團團轉，大東拿着多件女裝外套，更細心地為Kandy試穿，冧到師妹露出燦爛笑容！

懶理粉絲「圍拍」

正當大東與Kandy投入揀衫之際，大批粉絲已聞風而至，難得二人無懼大家眼望望，依舊拿起外套左襯右襯，大東更將自己戴着的毛毛耳罩套在Kandy耳上，兩個大細路你一言、我一語，玩個不停，相當溫馨！Kandy考慮良久，最後才扑錘買下一件背心外套，然後由側門離開。

為了答謝大東擔任形象設計，Kandy亦禮尚往來，帶他到鬧市品嘗咖喱魚蛋，可惜近20名粉絲包車跟隨，唱片公司即安排6名保安維持秩序，讓二人在不受騷擾下篤魚蛋！不過沿途仍吸引大批粉絲「圍攻」，紛紛以手機拍照留念。大東甫見熱辣辣的魚蛋即雙眼發光，急不及待狼吞虎嚥，還邊吔邊以半鹹淡廣東話大讚：「真係好好食呀！」僅僅5分鐘便消滅一大盒魚蛋，看來相當肚餓！篤完魚蛋，二人滿足地登車離開，大批粉絲亦飛奔上車緊隨偶像，場面險象環生！

「我當佢係兄弟」

事後，Kandy透過唱片公司表示：「我同大東識咗一段時間，之前做嘢見過，佢好Nice、好健談，成日問我香港有咩好食，咁啱佢嚟香港咪帶佢食咖喱魚蛋囉！（幫你揀衫？）係呀！我知佢讀設計出身，嚟緊我又要搵衫出席頒獎禮，所以叫埋佢幫吓眼，真係好多謝佢！（唔怕傳緋聞？）唔怕啩！我當佢係兄弟，希望啲粉絲唔好誤會啦！」