松岡李那否認拍拖 向啤梨問責

33C日模松岡李那（Linah）與葉文輝（啤梨）於平安夜撐枱腳斷正傳緋聞，但Linah立即否認拍拖，坦言不明白為何敗露行蹤，會向啤梨問個究竟。

松岡李那於平安夜被拍得與新城DJ葉文輝撐枱腳，更不乏拖手、搭膊頭等親密舉動。啤梨事後公開指Linah陪他走過最失意的時間，而其前女友無綫藝員梁麗瑩更在微博中高調表示舊愛有一名日本女朋友，並指對方是性感女星，與Linah不謀而合，令兩人的「戀情」曝光。

昨日Linah接受訪問，她看過報道後驚訝大叫，並澄清：「我同佢只係好朋友，我一向都大顛大肺，所以有好多男性朋友。（你哋拖手、搭膊頭？）我同佢識咗咁耐都冇Kiss、冇拖手。過馬路時捉住佢手臂叫佢行快啲，咁呢啲算唔算呀？（嗰日二人世界？）我哋一齊食飯，食完之後去咗佢老闆屋企開Party，有好多人一齊。（佢係咪追緊你？）我都覺得佢對我有意思，不過現階段我哋只係好朋友，未諗拍拖。（佢太矮？）有得揀梗係想男友高，不過愛情呢啲嘢好難講。」

王友良爆追求者眾

報道指啤梨送相機給Linah作聖誕禮物，她驚訝地說：「點解會知？我哋喺車裏面交換禮物。（有人放料？）我唔知，但我相信啤梨都唔會咁做，不過我會問佢！」另外，知情人士指啤梨知道Linah喜歡狗，於是送了一隻狗冧對方，更多次目擊啤梨夜訪Linah香閨。Linah冷靜地回應：「係呀，佢送咗隻狗仔畀我，佢間唔中都會嚟探吓隻狗，有時傾夜咗都好平常，好多朋友嚟我屋企都係咁！」

而引薦Linah來港發展的日本通王友良（Ivan）亦表示Linah很受歡迎，有很多追求者，問到啤梨是否追求者之一？他說：「我只知啤梨係對佢好細心，Linah拍拖一定會同我講，不過依家仲係單身。」