趙世曾飽餐揀蟀嗌Enjoy

城中富豪趙世曾昨日為旗下的「趙苑」平頂儀式大搞噱頭，邀請19位中國小姐候選佳麗捱冷穿比堅尼助興，還順理成章與靚女共進午餐。

趙世曾投資的「趙苑」最後一期完工，昨日舉行平頂儀式，身為《2010中國小姐大賽》接待及評委的趙世曾，特別邀請候選佳麗着比堅尼參與盛事。儀式前，趙世曾與19位佳麗在大宅共進午餐，艷福無邊，他說：「個儀式計劃咗好耐，我想有噱頭，之前考慮過搵明星或者知名財經界人士，後來中國小姐第一屆舉辦搵我支持。」

全部女友要彈開

是次活動佳麗分毫不收，趙世曾說：「冇畀利是，大會規定，我哋招呼佢哋，又贊助佢哋出席晚宴，但如果有啱嘅，將來可以請佢哋幫我嘅生意拍廣告或者代言。」大賽總組委會執行主席伍小平亦透露，佳麗參選期間不能接受任何利是或禮物。談到有性感美女相陪，趙世曾直認：「好Enjoy。（食物特別好味？）係，我一生人最重要係Enjoy，要開心。（唔怕女友呷醋？）全部女友都要避開，佢哋冇得嬲，做得我女友就要大方。」

鼓勵兒子識女仔

另外，其子趙式浩亦在場，趙世曾說：「向來鼓勵佢要識多啲女仔，希望佢同我一樣，有個愉快多姿多采嘅人生。（細仔式正？）佢怕醜，唔嚟。」而提到正在養和休養的細佬趙世光，趙世曾表示他是第二次中風，復原進度會比較慢：「有同佢主診醫生同家人聯絡，知佢好番少少，適當時候先去探佢。」記者昨日致電身在上海的趙世光太太何琍琍，她說：「雖然穩定啲，但點可能放心？不過呢邊有好多嘢做，冇可能唔理。」