擴大巿場求偶 剩女舒淇唔理國籍殺嫁
感情生活空虛多時的舒淇，昨晚出席新片首映禮時發表「剩女宣言」，願將擇偶條件範圍擴大，甚至擴大至「聯合國」，Dry爆的她自爆拍戲時對已婚的葛優動情！
由舒淇與葛優主演、馮小剛執導的《非誠勿擾2》，昨晚於灣仔會展舉行首映禮。出動私伙Tube Dress上陣的舒淇，翹實拍檔葛優進場，馮德倫、李曼筠與區文詩等藝人撐場。近日雖有指舒淇為新片頻撲宣傳而累極，但她昨晚心情勁靚，還在台上率領五對新人發表「終身愛你」宣言。不過，向來廣東話半桶水的她講到一舊舊，令人大惑不解，反而哄堂大笑。
自爆曾冧葛優
年屆34歲的舒淇現已被列入「剩女」行列，雖然她曾豪語若緋聞男友張震35歲仍娶不到老婆，兩人便會結婚，但身邊人仍擔心她「嫁唔出」。不過，單身的舒淇似乎已豁出去，更將擇偶條件進一步擴闊！問到將來結婚宣誓時用甚麼語言？她說：「睇吓將來嫁畀咩人，如果老外咪講英文！（咁你想將來嫁畀邊個國籍嘅老公？）聯合國！最重要有先算！」舒淇連已婚男士也不放過，自爆對已婚的葛優曾動情，她說：「感覺幾好，睇番《非2》覺得同葛優愈來愈襯，有幾好嘅默契。葛優係一個好謙虛嘅人，雖然唔識得氹女仔，但佢好尊重女仔，好Take Care身邊嘅人。（憧憬將來結婚？）我會諗做乜葛優咁早結婚呀！佢係一個幾唔錯嘅人，拍戲嘅時候多多少少都有真感情喺度。」
否認避見黎明
提到日前出席楊千嬅的結婚派對時，公開表示羨慕千嬅，問她當晚可有艷遇，舒淇說：「嗰日醉到我呢，每見一個朋友就飲一杯，所以醉咗兩日，今日先至醒。（有傳黎明為避你而缺席？）呢個我唔知，要問番佢喇！（再見面尷唔尷尬？）嘩！呢啲係陳年往事。」
此外，舒淇曾因拍戲抽離不到角色而演變成情緒問題，對於張敬軒在微博自爆患情緒病，她說：「呢樣嘢係要好靠自己去過度，相信嗰段時間會好唔開心，唔想見到人。（唔係有人陪會好啲？）當然有人陪會好少少，因為嗰段時間就算人講乜你都聽唔到，但最重要向好方面諗，『心病還須心藥醫』。」
Profile
舒淇（Shu Qi）
原名：林立慧
年齡：34歲（1976年4月16日）
三圍：34B、25、35吋
情史：黎明、張震、郭富城、馮德倫、王力宏、何尚謙＠Square
舒淇昨晚公開最近求愛宣言，希望「擴大市場」有「嫁」期。
舒淇帶領新人宣讀愛的宣言，但廣東話唔鹹唔淡，搞到馮小剛（右）一臉迷茫。
舒淇新片首映，好友馮德倫當然撐場。
李曼筠身穿小低V打扮出席首映，論「峰」頭有所不及。