傅穎撇大胸謙過Lonely Christmas

傅穎（Theresa）希望收到機票作聖誕禮物，到熱帶地方享受陽光與海灘，難道盛傳狠撇緋聞男友羅仲謙的她，需要旅行散心？

數月前被拍得跟「大胸謙」在沙灘戲水密會的Theresa，希望聖誕能到陽光與海灘的地方旅行，莫非戀情欲斷難斷，想投運動型的謙仔所好？她對此決絕地說：「上次係一大班人去游水，本雜誌冇出其他人咋！（點解聖誕想曬太陽？）冇男友咪想去熱帶地方囉！其實一直好想過白色聖誕，不過一個人好Lonely、又凍，最好有另一半陪我，不過今年真係冇機會！」似乎暗示與謙仔河水不犯井水。

希望收到機票作禮物的Theresa，被問有甚麼禮物適合剛鬧翻的謙仔？她敷衍地說：「我覺得佢最需要鬚刨，佢啲鬚剃完4粒鐘又生，每次見佢都係滿面鬚根，好滄桑！」但聽其語氣，看來送鬚刨只會「得個講字」！

呻港男唔識浪漫

此外，Theresa直言回憶中的聖誕節皆不浪漫：「雖然拍過4、5次拖，但好平淡咁過，只係參加朋友嘅Party，以前啲男友都唔浪漫，依家識浪漫嘅人愈嚟愈少！」雖然冇拖拍，但Theresa直言能專心搵銀及與家人慶祝未嘗不是一件好事：「聖誕節同親友喺屋企食火雞，玩抽獎都好開心！」