岑潔儀拖新仔遊北海道甜到漏

曾與陶喆傳緋聞的岑潔儀（Zoey），將與新男友到日本北海道 過白色聖誕，出發前，她先到本港商場欣賞聖誕布置，鍾情卡通公仔阿童木的她更扮機械人晒童真！

早前與台灣音樂才子陶喆傳緋聞的Zoey，與陶喆各自各精彩，近日有傳男方已另結新歡，Zoey的感情亦不再空白，更自爆將與男友離港度聖誕，她一臉幸福地說：「我會去北海道過聖誕，好開心可以過白色聖誕，係我第一個白色聖誕！（同新男友去？）係親密嘅男性朋友。（即係男友？）係！哈哈。」

將與男友共度首個甜蜜聖誕的Zoey，日前抽空到本地商場感受節日氣氛：「細個成日睇阿童木卡通片，好鍾意呢個公仔，依家大個咗都有睇佢嘅電影o架！由細到大都鍾意去有卡通人物做裝飾嘅地方過聖誕，飛去日本前就喺商場同阿童木過！」大唔透的她甫看見卡通公仔即擺出趣怪表情及扮機械人，童心未泯。

望買千萬豪宅

雖然有男友愛情滋潤，但Zoey亦希望自食其力搵真銀，聖誕及新年願望亦是搵錢至上：「我希望可以賺到一百萬，快啲買樓！不過我嘅目標係幾千萬豪宅，所以我都係唔止想搵一百萬，係要一千萬！」