阿嬌鄭融「情敵」碰頭鬥唔熟

緋聞情敵鍾欣桐（阿嬌）及鄭融前日在活動上首次碰頭，鄭融解釋因感冒菌入腸才影響表現，阿嬌昨日則再次澄清二人並無芥蒂：「我同鄭融真係唔熟！」

阿嬌昨日出席新碟《Move On...》簽名會，吸引逾百名歌迷排隊支持，排頭位的日籍男士更拿着十多張CD給偶像簽名，香港歌迷則送上暖手咕(o臣)，相當貼心。席間，阿嬌表示剛得知入圍《華鼎獎》「最受歡迎喜劇女演員」獎：「好開心！《出水芙蓉》首主題曲都有入圍。（同方力申一齊出席頒獎禮？）未知日期，但應該明年三月先舉行！」

此外，早前被指介入音樂人莊冬昕跟鄭融戀情的阿嬌，澄清前晚與「情敵」在頒獎禮同場並沒「面左左」：「其實係咪都係咁寫o架啦！同埋我同鄭融真係唔係好熟！」

感冒菌入腸發高燒

至於鄭融則解釋前日一臉憔悴只因身體不適：「我感冒菌入腸兼發高燒，仲要跑四個通告，頭先搭車嚟途中，仲要肚痛到落車解決！（見到阿嬌尷尬？）其實平時都係咁，冇乜特別，只係你哋太刻意留意大家嘅表情，唔好咁敏感啦！」她昨日更因病缺席活動，認真慘情！