羅仲謙閃婚
求變求存
周秀娜和羅仲謙今年成為影壇新貴，周秀娜一口氣拍了六部，而羅仲謙則雙線發展走進大銀幕和公仔箱，早前提名台慶「飛躍進步獎」可惜落敗！
記：失意「飛躍進步獎」，有冇失望？
羅：當初我真係平常心面對呢個獎，所以冇話好失望，覺得浩然攞呢個獎係實至名歸。我一開始入行，定畀自己嘅目標好低，唔係要一炮而紅，只係想有進步，有進步已經係對自己有交代。我覺得做Artist要等一個機會，當有一個機會幫到自己，就要好好把握，因為唔會成日都有呢個機會。
周：我都覺得係要等呢個機會，雖然今日我唔可以話自己有咩大成就，但至少喺生活上可以自給自足。
記：你係「模一姐」喎！
周：我唔係呀！從來冇諗呢樣嘢，呢個係人哋講之嘛，我自己冇咁諗！
記：有傳你依家開始收起性感？
周：唔係，係隨住年紀同埋工作性質嘅改變，我唔會畀框框去限死自己，要視乎情況而定。
記：有好角色可以再性感啲？
周：當然我都想自己個Body會有好啲嘅時候，所以我會Keep住做運動，因為我覺得身體語言對演員嚟講幾緊要，對拍戲都有幫助。
記：新一年事業有咩目標？
羅：我不嬲都會以偶像為目標，就係任達華先生，因為佢家庭，事業、自身，都係非常之接近完美，我希望第時有機會好似佢咁，所以我成日都模仿佢。
周：我想擺多啲時間喺電影上，我想向住演員嘅方向走，喺電影方面有多啲嘗試，希望演唔同嘅角色！
記：要開始轉型？
周：我又唔視呢個為轉型，我覺得好似自己嘅性格咁，鍾意多變，Model都係一個過程，我諗去到另一個階段，又係時候畀啲新嘅嘢大家睇。
後記：聽教聽話先識撈
今次周秀娜和羅仲謙在新片《婚前試愛》首度合作，即上演幕幕床上戲，大騷身材滿足時下港男港女，訪問當天二人雖然收起「性感」，但全程有求必應，可見做藝人的生存之道，未必一味靠露，識撈才是王道！
女人湯圓
去年羅仲謙為求突破苦練40吋巨胸成為「大隻謙」，他曾與不少靚女合作，堪稱「女人湯圓」！
傅穎 羅仲謙早前與同屬星皓的傅穎傳緋聞，不過最近傅穎突然劃清界線，有傳導火線是男方在《婚前試愛》中與「浸大E神」楊梓瑤有大膽床戲。
江若琳 07年曾兩度為江若琳MV擔任男主角，其後多次合作電影，江若琳在《六樓后座2家屬謝禮》中，將銀幕初吻獻給羅仲謙，更因而傳出緋聞，但二人雙雙否認。
梁靖琪 去年羅仲謙獲無綫力捧為新人王，演出不少劇集，今年四月與梁靖琪合作劇集《團圓》，兩人在街頭上演一場激吻戲，惹來不少話題。
羅仲謙把握每一個演出的機會，只求無愧於己。
合作過拍戲的周秀娜與羅仲謙，連擺甫士都甚有默契。
