周秀娜恨嫁

每個演員成功背後的不二法門，不外乎是堅持和努力，近年則加了新法則—有「事業線」便有事業！線長一吋值千金，模一姐周秀娜和羅仲謙同樣擁有，兩人更憑好身材在影壇上起步，事業現曙光之際，兩人對婚姻亦有憧憬，一起「談情說愛」！當初人人對o靚模不太受落，指她們過分賣弄性感，經過兩、三年時間的「洗腦」後，觀眾已漸漸放下有色眼鏡，o靚模亦漸漸轉型，令別人發掘她們的另一面，當中最成功莫過於「o靚模一姐」周秀娜，她出名EQ高，當年出牙膏寫真腹背受敵都未驚過，今年拍戲一部接一部，算是一個好開始！今次新戲拍檔是入行六年的羅仲謙，他背後亦有過幾許辛酸，所以話「時勢造英雄」，有「事業線」，事業便有機！

記：記者　周：周秀娜　羅：羅仲謙

星路難行

記：做演員呢條路，難唔難行？

羅：真係幾難！一個好演員要具備好多條件，都要等機會，自己入行都六年，試過一個月冇工開，依家總算叫做有人識我，已經好開心㗎喇！

周：都難㗎！初初入行唔算多Job，但係我個性格幾自我，做每件事都堅持到底，所以我冇諗過轉行，我嗰陣有Set個限期畀自己，唔可以無限期停留喺同一個位置。

記：係咪有好大滿足感？

周：係呀！雖然有時過程係幾辛苦，但都唔會覺得嗰樣嘢係大得過你鍾意嗰樣嘢，如果你鍾意自己做緊嘅事業，呢樣嘢會係最大嘅成就感同喜悅感。

記：你哋有共同優點，就係一樣有「事業線」，點睇自己嘅身形？

羅：唔好話「事業線」，係身形比例比較靚啫！

周：我好欣賞自己好靚嘅身形比例，人哋覺得我成日拍嘅嘢好性感，其實我只係想將自己好嘅一面畀人睇，我唔介意性感，如果工作有呢個需要，我唔會刻意收埋。

羅：我會欣賞自己多啲，我好自戀呀，哈哈！每次做完運動，我都會喺塊鏡度照好耐，不過好老實講，我又唔會特別因為咁而有自信喎！因為我就係知道自己缺點係乜嘢，所以我只係想將自己嘅優點無限放大，去掩蓋自己缺點。

感情專一

提到感情，近日與傅穎傳緋聞的羅仲謙自認專一好男人，遇到好女仔隨時結婚，而早前與男友Avis冷戰的周秀娜則流露恨嫁心。

記：對婚姻有咩睇法？

周：我覺得一定要結婚，女仔點都要嫁人，我媽咪又係二十幾歲結婚，所以我細個時覺得自己會幾後生就結婚。

記：有冇話幾多歲前要結婚？

周：呢刻我想做咗想做嘅嘢先去諗結婚，所以冇Set自己要幾多歲前嫁人。

羅：我喺單親家庭長大，好細個已經想有個完整家庭，結婚呢樣嘢，我冇畀自己限期，最緊要係有能力畀到另一半幸福，如果有能力嘅話，我呢一刻都會。

記：你係咪一個好男友？

羅：我自認都幾專一o架！幾遷就女仔，依家好多後生仔面對愛情都可能會有好大誘惑，一腳踏兩船，我一定唔會，我可以接受拍散拖，拍完一個又一個，但唔可以疊住。

周：呢啲男仔，女仔好Buy o架！係女仔都想揀個錫自己嘅男友，但當然唔係將自己變成公主病，係要搵一個最好嘅相處方式。

記：之前你同男友鬧交，點樣和好？

周：我哋會用同一個解決方式，首先冷靜咗先，因為一唔冷靜就番唔到轉頭，好嬲嗰陣講嘅嘢唔可以當真，所以我哋個解決方式，係大家冷靜一排先，之後將個問題攞出嚟講。