栢芝馬背墮地受傷

張栢芝復出後變身「女版謝霆鋒」，拍戲時毫不錫身，日前更由馬背墮地受傷，令粉絲擔心得當場痛哭！

張栢芝近日忙於在內地趕拍與任賢齊合演的新片《楊門女將之軍令如山》，飾演穆桂英的她，日前拍攝騎馬勇救愛兒文廣的戲份時發生意外，由馬背墮地受傷！專業的她昨日如期往蘇州出席剪綵活動，並於傍晚返港，預計今日才看醫生作詳細檢查。

自誇忍得痛

其經理人Emily昨日接受電話訪問時，詳述栢芝的受傷經過：「嗰日風沙好大，有6至7級風勢，栢芝喺馬背試咗兩次都冇事，點知真正拍攝嗰陣，馬匹突然將佢摔咗落地！由於盔甲戲服好重，栢芝好難企起身，匹馬仲幾乎踩落佢度，好彩馬主醒目即刻拉住，而飾演丫環嘅臨時演員就幫手托一托，搞到自己尾龍骨都有事，栢芝就手腳、肩頸同膊頭等多處擦傷！」

栢芝受傷的消息由化妝師Will在微博公告天下，由於未有交代詳情，令粉絲極為擔心，有人更哭起來，為安撫粉絲，栢芝忍痛透過經理人上載靚相報平安，並寫上：「一定要記得（我）永遠是最能忍痛和有勇氣的女人哦！」

栢芝丈夫謝霆鋒，昨日在助手「表哥」陪同下到成都公幹，至截稿前未有回覆。至於謝賢得悉新抱仔受傷後淡然地說：「我已經見過佢，冇事喎！（叫佢錫身啲？）嘩！你估叫就聽咩！工作緊要，佢今次返嚟，都係因為掛住老公同兩個仔，想敍吓天倫啫！」