森美有工開唔等錢使

森美與小儀昨日現身Pizza Hut《暖笠LOVE冬日電車派對》，森美否認與無綫節目主持Michael涉金錢糾紛，更揚言唔等錢使！

森美、小儀及鍾浠文昨日結伴出席活動，森美與小儀艷福不淺，森美先獲熱情聖誕女郎攬到實兼送吻，而小儀則被參賽者當成女友，跪地求婚，令全場爆笑。對於被傳與無綫節目《為食一條街》主持林澄光（Michael）涉金錢糾紛，森美說：「兩年前嘅事，當時佢叫我夾份投資飲食，畀咗10萬蚊，之後聽到傳言話佢同人有錢銀轇轕，所以叫佢畀番錢我！（等錢使先畀番你？）好彩今日仲有嘢做，唔係等錢使！總之畀番我就OK喇，大家關係好好，之後都有合作，冇呃嘅成分！」

森美表示報道出街後有SMS通知對方，至於有傳Michael火速搭上高海寧及高調地向朋友炫耀，森美力撐Michael為人不花弗：「我唔信，唔信佢咁多人鍾意，我都冇！（你有模特兒獻吻？）工作啫，我都愕然，有啲尷尬！」

高海寧轟報道荒謬

至於高海寧接受電話訪問時直指傳言荒謬：「絕對冇啲咁嘅事，好莫名其妙！我唔覺得佢追我，大家只係工作上合作，私底下冇出嚟行街食飯！（對方口花花？）工作嗰陣唔係，都好有風度！我同佢只係工作上認識嘅，為人唔清楚。」