王喜慘變「三冇」12真言潤林峯

早前宣布與鍾嘉欣組情侶檔搵銀的王喜，昨日宣傳新劇時自爆變「三冇」，眼見聖誕掘金夢成空，即笑言要與對方拆夥，更抄老闆方逸華橋以12真言潤林峯。 文、攝：影視組

王喜、鍾嘉欣及黃浩然等昨日到尖沙咀宣傳新劇《囧探查過界》，吸引不少途人圍觀及玩遊戲，場面熱鬧。在劇中與嘉欣飾演情侶的王喜，曾表示希望以情侶檔搵銀，問到聖誕的工作量有否增加，他卻大呻慘變「三冇」：「我宣布同鍾嘉欣拆夥，炒佢魷魚！冇人搵我哋做嘢，冇人寫又冇人跟！」問到是否因嘉欣與林峯的螢幕情侶形象深入民心，他即效法六嬸方逸華拋出12真言：「證明無綫捧人係善用資源、水銀瀉地、無孔不入囉！仲係多角度、多層次，捧起想捧嘅人！」認真應景！

嘉欣撐演技唔浮誇

對於崔建邦醉駕獲輕判兼有傳「翻生」任《勁歌金曲》主持，王喜說：「監製有需要搵佢！（佢係陳志雲叛黨？）冇話叛唔叛徒，都係無綫一分子！我同鍾嘉欣唔得，不如試吓同崔建邦啦！（崔建邦對朋友唔好，舊女友鄺敏慧都唱佢！）我同佢哋唔熟，問番佢哋啦！」

至於劇中飾演開心鬼的嘉欣，雖被網友批評演技浮誇，但她強調純屬劇本需要，在劇中勁冧林峯亦然：「林峯好紅，做偶像最啱！」她透露因趕拍新劇《抉宅男女》而未能跟王喜組情侶檔搵銀，損失慘重！