葉童嘆失策：盡快落咗個肚
有傳葉童為綁實花弗老公陳國熹，以48歲高齡懷孕，但她堅決否認有喜：「我要盡快落咗個肚先得！」
葉童與陳國熹結婚22年，可惜老公花弗成性，經常被拍到夜蒲攬女，花弗史一大籮，今年初，便拍到在大型商場與中女攬錫，而2002及2003年則曾跟梅艷芳前經理人王敏慧和台灣性感女星安雅等傳緋聞，但葉童一直力撐老公。
陳國熹：唔知佢講乜
近日見葉童腹部明顯凸起，行路有點論盡，跟孕婦無異。有指葉童為綁實老公，最近以48歲高齡搏到盡懷孕3個月，更被拍得疑似大肚照！對此，葉童不怒反笑說：「話我肥就算啦！話我大肚仲尷尬，真係一時失策，我要盡快落咗個肚先得！」
至於會否考慮生小朋友？葉童笑說：「神經咩！依家諗太遲啦！我就唔會喇！我老公就仲有機會，佢咁花弗，如果有，都係我老公個仔，唔係我個仔囉！」堅決否認懷孕。
而陳國熹被問到此事時則說：「我冇睇過有關嘅報道。（葉童話有都係你有，唔係佢喎？）我唔知佢講乜，唔會發表任何意見。」大肚傳言孰真孰假，相信數月後自有分曉。
傳懷孕三個月的葉童自嘲失策，笑言要盡快「落咗個肚」。（資料圖片）
葉童自言年紀大，指老公陳國熹仍有機會生小朋友。（資料圖片）
陳國熹早前被拍得在商場攬女。（資料圖片）