廖碧兒：光明正大 陳豪登晒先知

陳豪與廖碧兒的6年感情，隨着女方被本報踢爆撻着「富二代」林忠豪（Alastair）而玩完，陳豪昨日足不出戶治情傷，懵然不知被飛的他，揚言會重組自己，為感情及事業再度出發。陳豪與廖碧兒（Bernice）多年前因合作劇集《心花放》而傳拍拖，6年感情離離合合，直至被本報踢爆Bernice與坐擁數億身家的富豪二代Alastair拍拖後，陳豪不得不正式「分手」，昨日不用為《心戰》開工的陳豪，更在家中閉關治情傷。

唔介意與闊少比較

雖然甩拖，但陳豪在電話訪問中並沒有酸溜溜：「算啦！緣分呢啲嘢，係你就係你，好多嘢都整定！（知道佢哋拍拖？）唔知，佢冇同我講！（Bernice打畀你交代？）唔使交代都好清楚！登晒出嚟！（酸溜溜？）平淡心情面對，我信緣分！（祝福佢？）只要佢平安，我就安心！（影響你哋「情侶檔」搵銀？）應該唔會，公司會有適當安排！工作嘅嘢我採取Open態度，每個Job都係機會！（話你「雙失」？）」咪重新嚟過！（外邊有大片森林？）唔知，總之重組自己，明年再出發！（介意與闊少比較？）唔介意，人本來就冇分高低！」至下午三時，原本足不出戶的陳豪，其座駕由三名疑是其親友的人駛出，往天后方向行駛，估計是前往陳媽媽家。

朋友降呢變同事

至於Bernice昨日返回電視城開工，提起陳豪，她的稱呼已由朋友「降呢」至同事。提起新戀情，她風騷地說：「朋友啫！食飯時一大班人，仲一齊去咗另一度食大閘蟹，之後再去其中一個朋友嘅Party！（點識林忠豪？）朋友介紹，識咗一段時間！（發展到咩階段？）大家係朋友，將來嘅嘢大家都唔知！我以前讀工商管理，呢班朋友係做生意，又係回流返港，有共同話題！（陳豪都認識林忠豪？）大家各有朋友！（同陳豪Close啲定係呢個？）唔講！（背住佢識呢個男仔？）不嬲光明正大！（突然富貴用名貴手袋？）幾年前嘅生日禮物！（林寶堅尼好坐？）架車好矮。」對於林忠豪力讚她人品及形象好，她說：「真係咁講？係就多謝佢。（加分？）朋友之間唔講分數。」