哈利仔 妙麗 榮恩 蛻變起飛
《哈利波特》電影系列已拍畢,三位主角「哈利仔」丹尼爾烈格夫、「妙麗」愛瑪沃森及「榮恩」路拔格連亦蛻變成長,並積極計劃未來!
丹:丹尼爾 愛:愛瑪 路:路拔 記:記者
愛瑪沃森 感受自由
記:拍新一集《哈》片時有冇難忘嘅地方?
愛:其中一幕講妙麗為咗跟哈利仔去決鬥佛地魔,隨時會喺旅途中死亡,但為咗唔令父母擔心,出發前先用魔法洗咗佢哋嘅記憶,即使自己死咗都唔會傷心。最後幾集《哈》片好似係考演技咁,有好多場面都要細膩演繹!
記:拍完《哈》片,下一步有咩打算?
愛:依家對我嚟講係一個過渡期,我暫時冇打算,只想好好享受依家嘅悠閒。我依家喺美國讀書,有好大自由,亦有較大嘅私人空間。
記:美國嘅讀書生活係點?
愛:非常好!不過美國同英國文化非常唔同,美國文化比較友善,較歡迎唔同人物。
丹尼爾 尊重愛情
記:拍咗七集《哈》片,到最後一幕有咩心情?
丹:同其他工作人員一樣,拍到最後一幕心情好激動,仲喊咗出嚟!最後一場係講要潛入冰湖入面攞劍,之後困喺湖中。拍完我哋仲一同燒烤慶祝,正好嗰日舉行英格蘭對美國嘅世界盃賽事。
記:拍攝《哈》片之後,有咩計劃?
丹:我諗會繼續投身拍攝工作,唔會為賺更多錢而不斷拍戲,只想為好劇本而拍!希望將來可以保持對電影嘅熱誠。
記:面對記者追問時有冇太大壓力?
丹:細個時候,記者唔會問太多私人嘢,不過呢幾年記者嘅題問愈來愈尖銳,佢哋希望我可以透露更多私人事,畀佢哋有新聞寫,但就影響我生活!
記:會唔會因此唔拍拖?
丹:唔會!事實上我都有拍拖,一段維持咗三年,另一段則維持咗年半。我係一個負責任嘅人,唔會隨便展開感情。
路拔格連 享受生活
記:拍咗十年有冇影響你嘅童年生活?
路:雖然童年大部分時間都喺片場度過,不過我嘅生活同平常人一樣,我有一個大家庭,有自己嘅朋友,或者呢個係我喺大量拍攝工作下取得平衡嘅原因,而且咁多年嚟都冇乜大改變。
記:平時喜歡點減壓?
路:我鍾意車,屋企後院養驢仔,有時間會做園藝,好似平常人咁。